Agenda a Chofnodion

Cyhoeddwyd bod Eitem 9 ar Agenda Bwrdd y Cabinet, 'Opsiynau dylunio ar gyfer gwaith adfer Tomen Cilmaengwyn uwchben Ysgol Gynradd Godre’r Graig', wedi ei thynnu’n ôl o gael ei hystyried yn y cyfarfod hwn i alluogi Swyddogion i geisio gwybodaeth atodol bellach. Cadarnhawyd y byddai adroddiad ynghylch y mater hwn yn cael ei gyflwyno i'w ystyried yn y cyfarfod nesaf.

Gwnaeth yr Aelod canlynol ddatganiad o fudd:

Y Cyng. M Harvey -                         Parthed. Eitem 8 Agenda Bwrdd y Cabinet - Adroddiad Parcio Blynyddol 2020/2021, oherwydd yn ei rôl yn gweithio i Heddlu De Cymru, mae'n asesu meysydd parcio sy’n cael eu crybwyll yn yr adroddiad fel rhan o'r Cynllun Parcio Mwy Diogel.

Derbyniodd y Pwyllgor adroddiad ynghylch Ymgyrch Gorfodi Parcio 2021, a oedd yn manylu ar y lefelau staffio presennol yn is-adran gwasanaethau parcio'r awdurdod.

Gofynnodd yr Aelodau a oedd y cyngor yn cyfyngu ar nifer yr hawlenni sy’n cael eu rhoi mewn perthynas â'r lleoedd parcio sydd ar gael; ac os cafodd hyn unrhyw effaith ar y strydoedd cyfagos, yn enwedig ardaloedd tai teras. O ran y polisi presennol, dywedwyd y gallai dau breswylydd fesul aelwyd dderbyn hawlenni parcio; lleihawyd hyn i un hawlen os oedd ardaloedd parcio oddi ar y ffordd neu os oedd garej yn yr eiddo. Nid oedd y cynllun hawlenni presennol yn gwarantu lle yng nghilfachau preswylwyr, fodd bynnag roedd yn cynnig cyfle gwell i breswylwyr barcio'n nes at eu heiddo. Nodwyd, pan fydd Swyddogion yn asesu stryd, fod yn rhaid iddynt gadw tua 30% o'r stryd yn anghyfyngedig, sy'n caniatáu i ymwelwyr a'r rheini nad oeddent yn gallu parcio mewn cilfach, allu parcio mewn ardal anghyfyngedig; lle'r oedd strydoedd cyfyngedig iawn, mae'n anochel weithiau y bydd yn rhaid i breswylwyr barcio ar strydoedd cyfagos. Soniodd swyddogion, gyda chynnydd yn nifer y cerbydau preifat, fod mwy o geir na lleoedd parcio ar y strydoedd mewn rhai ardaloedd, yn enwedig lle'r oedd tai teras. Ychwanegwyd, er mwyn cyflwyno hawlen ar gyfer parcio ar y stryd, mae'n rhaid i'r car fod wedi'i gofrestru i eiddo ar y stryd.

Soniwyd bod rhai ardaloedd a lleoedd ar draws y Fwrdeistref Sirol a allai fod yn addas ar gyfer cilfachau parcio ychwanegol, er enghraifft, ymylon; Gofynnwyd i swyddogion a allent ymchwilio i'r math hwn o ateb i’r broblem ac a oedd unrhyw grantiau y gellid eu defnyddio i gwblhau'r gwaith hwn. Dywedodd Swyddogion nad oedd grantiau penodol ar gael i greu cilfachau parcio preswyl oddi ar y ffordd; yn y gorffennol, bu cynlluniau lle'r oedd y cyngor yn gallu creu cilfachau parcio oddi ar y ffordd, fodd bynnag ni fu unrhyw gynlluniau tebyg ers tro oherwydd y pwysau ar y gyllideb cynnal a chadw priffyrdd. Nodwyd bod y math hwn o waith yn bosib pe deuai arian heb ei gynllunio ar gael; roedd y tîm yn agored i awgrymiadau a byddent bob amser yn ceisio creu lleoedd parcio ychwanegol, lle bo hynny'n bosib, i breswylwyr. Esboniwyd y byddai angen hysbysu Swyddogion o broblemau penodol yn wardiau'r Aelodau er mwyn iddynt nodi unrhyw gyfleoedd am gyllid i ariannu prosiectau gwaith penodol.

Cododd yr Aelodau bwyntiau’n ymwneud â phatrwm gwaith y staff a'r angen am ragor o adnoddau yn y gwasanaeth; a dywedon nhw er bod rhai elfennau gorfodi wedi bod yn effeithiol, fel y fan teledu cylch cyfyng, byddai angen rhagor ohonynt er mwyn gwneud y gwaith gorfodi’n fwy effeithiol. Cadarnhaodd Swyddogion fod y fan teledu cylch cyfyng wedi bod yn effeithiol iawn ers iddi gael ei chyflwyno; fodd bynnag, o dan y ddeddfwriaeth, gallai'r fan teledu cylch cyfyng orfodi rhai gorchmynion traffig yn unig, fel y rheini'n ymwneud â llinellau melyn dwbl, safleoedd bysus a chilfachau bysus, marciau igam ogam a gorchmynion  ...  Gweld y cofnodion lawn ar gyfer eitem 3.

Dewis eitemau priodol o agenda’r Cabinet ar gyfer craffu cyn penderfynu (amgaeir adroddiadau ar gyfer yr Aelodau Craffu)

Craffodd y Pwyllgor ar yr eitemau canlynol ar agenda Bwrdd y Cabinet:

Adolygiad Polisi Biniau Graean Bob Tair Blynedd

Rhoddwyd adolygiad o bolisi biniau graean y cyngor i'r Aelodau.

Esboniodd swyddogion fod y polisi biniau graean wedi cael ei lunio yn 2012, a'i fod wedi'i gyflwyno i'r Pwyllgor ar sail adolygiad tair blynedd ers hynny; ni fu unrhyw newidiadau i'r polisi ers iddo gael ei lunio yn 2012. Tynnwyd sylw at y ffaith oherwydd penderfyniadau anodd blaenorol ynghylch y gyllideb, gan gynnwys toriadau i'r Gwasanaethau Cymdogaethau, nad oedd llawer o arian ar gael ar hyn o bryd ar gyfer gweithgarwch ychwanegol yn y gwasanaeth.

Hysbyswyd yr Aelodau fod biniau graean wedi'u prynu mewn sypiau a'u bod yn cael eu hamnewid yn ôl yr angen, ynghyd ag ail-lenwadau y gellid eu prynu yn unol â'r polisi; y llynedd, adroddwyd bod tri bin graean wedi'u difrodi ac roedd naw bin graean yn absennol o'u lleoliad arferol. 

Nodwyd bod cynnal biniau graean yn creu swm sylweddol o waith a galw am wasanaeth i'r Tîm Cymdogaethau; yn ogystal â'r gwaith o ail-lenwi rheolaidd a oedd fel arfer yn cael ei wneud, cafwyd 100 cais am ail-lenwadau ychwanegol y llynedd. Tynnodd Swyddogion sylw at y ffaith bod angen cydbwyso lefel gyfyngedig o adnoddau ar draws ystod o weithgareddau y mae'r Tîm Cymdogaethau yn eu cyflawni; oherwydd y ffaith nad oedd sefyllfa’r gyllideb wedi gwella, yr argymhelliad oedd cynnal y polisi am gyfnod o dair blynedd ychwanegol. Ychwanegodd Swyddogion, pe bai'r Aelodau am adolygu manylion y polisi, y byddai'n bwysig ystyried y ceisiadau am finiau graean gan yr holl Aelodau Etholedig yn eu cyfanrwydd a sicrhau bod pa bynnag newidiadau a wnaed yn cyd-fynd â'r gyllideb fel y gellid eu hariannu a'u cynnal.

Mynegodd yr aelodau eu pryderon o ran y polisi biniau graean presennol gan dynnu sylw at yr anawsterau a brofwyd yn ystod misoedd y gaeaf; yn enwedig mewn ardaloedd lle nad oedd llawer o finiau graean neu unrhyw rai o gwbl. Roedd yr aelodau wedi gobeithio y byddai rhagor o finiau graean ar gael, yn enwedig mewn ardaloedd lle roedd rhiwiau; gofynnwyd a oedd ymarfer mapio wedi'i gwblhau i nodi ble roedd y gwahanol finiau graean wedi'u lleoli ac a ellid edrych i mewn i'w cyfartalrwydd.

Cadarnhaodd Swyddogion fod gan system gwybodaeth ddaearyddol y cyngor haen a oedd yn cynnwys lleoliad yr holl finiau graean ar draws y fwrdeistref sirol. Soniwyd bod gan y polisi biniau graean feini prawf cymhwysedd a oedd yn cynnwys y nodweddion a'r amodau angenrheidiol o gael bin graean ar gyfer ardaloedd gwahanol; roedd mwy o rhywiau mewn rhai ardaloedd yn y fwrdeistref sirol nag eraill, felly byddent yn flaenoriaeth wrth gael gafael ar fin. Hysbyswyd yr Aelodau na fydd y dosbarthiad yn gyfartal oherwydd hyn. Ychwanegwyd, dan y polisi presennol, bod hawl gan Aelodau i symud bin graean i leoliad arall yn eu ward os oedd angen; fodd bynnag, os nad oedd gan y ward fin graean i'w symud, yna ni fyddai hyn yn gallu digwydd.

Cafwyd trafodaeth  ...  Gweld y cofnodion lawn ar gyfer eitem 4.

Gofynnodd yr Aelodau i wybodaeth yn ymwneud â gorfodi gwastraff ar yr ochr yn y Gwasanaeth Gwastraff gael ei hychwanegu at y Blaenraglen Waith. Cytunwyd y byddai'r elfen hon yn cael ei chynnwys yn yr adroddiad ar orfodi sbwriel a thipio anghyfreithlon y disgwylir iddo gael ei gyflwyno i'r Pwyllgor ar 28 Ionawr 2022. 

Nodwyd y Blaenraglen Waith ar gyfer Pwyllgor Craffu’r Strydlun a Pheirianneg.

Mynediad i gyfarfodydd i benderfynu a ddylid gwahardd y cyhoedd o'r eitem ganlynol yn unol ag Is-adran 100a(4) a (5) Deddf Llywodraeth Leol 1972 a'r paragraffau eithriedig perthnasol o Ran 4 Atodlen 12a y Ddeddf uchod.

Dewis eitemau preifat priodol o agenda cyn craffu Bwrdd y Cabinet (Adroddiadau Bwrdd y Cabinet yn amgaeedig ar gyfer yr aelodau craffu).

Dewisodd y Pwyllgor graffu ar yr eitemau canlynol ar agenda Bwrdd y Cabinet:

Cytundeb Adran 38 Deddf Priffyrdd 1980, Taliad Swm Gohiriedig - Cae Morfa, Camau Tri a Phedwar Sgiwen

Derbyniodd yr Aelodau adroddiad mewn perthynas â sefyllfa Adran 38 Datblygiad Cae Morfa ynghylch lefel y symiau gohiriedig ar gyfer cynnal a chadw'r datblygiad yn y tymor hir.

Yn dilyn y broses graffu, roedd y Pwyllgor yn gefnogol i'r argymhelliad i fynd at Fwrdd y Cabinet.