Agenda item

Dewis eitemau priodol o agenda’r Cabinet ar gyfer craffu cyn penderfynu (amgaeir adroddiadau ar gyfer yr Aelodau Craffu)

Craffodd y Pwyllgor ar yr eitemau canlynol ar agenda Bwrdd y Cabinet:

Adolygiad Polisi Biniau Graean Bob Tair Blynedd

Rhoddwyd adolygiad o bolisi biniau graean y cyngor i'r Aelodau.

Esboniodd swyddogion fod y polisi biniau graean wedi cael ei lunio yn 2012, a'i fod wedi'i gyflwyno i'r Pwyllgor ar sail adolygiad tair blynedd ers hynny; ni fu unrhyw newidiadau i'r polisi ers iddo gael ei lunio yn 2012. Tynnwyd sylw at y ffaith oherwydd penderfyniadau anodd blaenorol ynghylch y gyllideb, gan gynnwys toriadau i'r Gwasanaethau Cymdogaethau, nad oedd llawer o arian ar gael ar hyn o bryd ar gyfer gweithgarwch ychwanegol yn y gwasanaeth.

Hysbyswyd yr Aelodau fod biniau graean wedi'u prynu mewn sypiau a'u bod yn cael eu hamnewid yn ôl yr angen, ynghyd ag ail-lenwadau y gellid eu prynu yn unol â'r polisi; y llynedd, adroddwyd bod tri bin graean wedi'u difrodi ac roedd naw bin graean yn absennol o'u lleoliad arferol. 

Nodwyd bod cynnal biniau graean yn creu swm sylweddol o waith a galw am wasanaeth i'r Tîm Cymdogaethau; yn ogystal â'r gwaith o ail-lenwi rheolaidd a oedd fel arfer yn cael ei wneud, cafwyd 100 cais am ail-lenwadau ychwanegol y llynedd. Tynnodd Swyddogion sylw at y ffaith bod angen cydbwyso lefel gyfyngedig o adnoddau ar draws ystod o weithgareddau y mae'r Tîm Cymdogaethau yn eu cyflawni; oherwydd y ffaith nad oedd sefyllfa’r gyllideb wedi gwella, yr argymhelliad oedd cynnal y polisi am gyfnod o dair blynedd ychwanegol. Ychwanegodd Swyddogion, pe bai'r Aelodau am adolygu manylion y polisi, y byddai'n bwysig ystyried y ceisiadau am finiau graean gan yr holl Aelodau Etholedig yn eu cyfanrwydd a sicrhau bod pa bynnag newidiadau a wnaed yn cyd-fynd â'r gyllideb fel y gellid eu hariannu a'u cynnal.

Mynegodd yr aelodau eu pryderon o ran y polisi biniau graean presennol gan dynnu sylw at yr anawsterau a brofwyd yn ystod misoedd y gaeaf; yn enwedig mewn ardaloedd lle nad oedd llawer o finiau graean neu unrhyw rai o gwbl. Roedd yr aelodau wedi gobeithio y byddai rhagor o finiau graean ar gael, yn enwedig mewn ardaloedd lle roedd rhiwiau; gofynnwyd a oedd ymarfer mapio wedi'i gwblhau i nodi ble roedd y gwahanol finiau graean wedi'u lleoli ac a ellid edrych i mewn i'w cyfartalrwydd.

Cadarnhaodd Swyddogion fod gan system gwybodaeth ddaearyddol y cyngor haen a oedd yn cynnwys lleoliad yr holl finiau graean ar draws y fwrdeistref sirol. Soniwyd bod gan y polisi biniau graean feini prawf cymhwysedd a oedd yn cynnwys y nodweddion a'r amodau angenrheidiol o gael bin graean ar gyfer ardaloedd gwahanol; roedd mwy o rhywiau mewn rhai ardaloedd yn y fwrdeistref sirol nag eraill, felly byddent yn flaenoriaeth wrth gael gafael ar fin. Hysbyswyd yr Aelodau na fydd y dosbarthiad yn gyfartal oherwydd hyn. Ychwanegwyd, dan y polisi presennol, bod hawl gan Aelodau i symud bin graean i leoliad arall yn eu ward os oedd angen; fodd bynnag, os nad oedd gan y ward fin graean i'w symud, yna ni fyddai hyn yn gallu digwydd.

Cafwyd trafodaeth ynglŷn â'r canllawiau presennol a gynhwyswyd yn y polisi. Gwnaeth yr Aelodau awgrymiadau amrywiol yn ymwneud â'r hyn y gellid ei ychwanegu at y polisi a'i adolygu er mwyn gwneud gwelliannau; er enghraifft, ystyried oedran a diamddiffynnedd preswylwyr, nodi a oedd ardaloedd penodol yn dueddol o gael rhew yn ystod tymor y gaeaf a rhoi disgresiwn i Swyddogion pe bai achos cadarn dros ddarparu bin graean i ardal.

Yn dilyn y trafodaethau a'r pryderon a godwyd gan yr Aelodau, cynigiwyd ac eiliwyd diwygiad ffurfiol i'r argymhelliad a gynhwyswyd yn yr adroddiad a ddosbarthwyd:

'Bod y Polisi Biniau Graean presennol yn parhau nes y bydd Pwyllgor Craffu’r Strydlun a Pheirianneg yn adolygu’r polisi ac y rhoddir adroddiad i’w ystyried mewn cyfarfod Bwrdd Strydlun a Pheirianneg y Cabinet yn y dyfodol'.

Penderfynwyd bod y Pwyllgor o blaid y gwelliant i'w ystyried gan Fwrdd y Cabinet.

Dangosyddion Perfformiad Allweddol 2021/2022 - Perfformiad Chwarter 1 (1 Ebrill 2021 - 30 Mehefin 2021)

Adroddodd Swyddogion am ddata rheoli perfformiad chwarter 1 ar gyfer y cyfnod 1 Ebrill 2021 i 30 Mehefin 2021.

Cyfeiriodd yr Aelodau at y dangosydd perfformiad yn ymwneud â chanran y gwastraff, boed wedi'i ailddefnyddio, ei ailgylchu neu ei gompostio; a thynnodd sylw at y ffaith bod y ffigurau targed yn cynyddu. Cadarnhaodd Swyddogion mai'r targed cyfredol ar gyfer y dangosydd perfformiad hwn oedd 64%, a fyddai'n cynyddu i 70% ar gyfer y flwyddyn ddinesig 2024/25.

Yn dilyn craffu, nodwyd cynnwys yr adroddiad.