Agenda a Chofnodion

Gwnaeth yr aelod canlynol ddatganiad o fudd ar ddechrau'r cyfarfod:

Cymeradwyo cofnodion yr ymgynghoriad ar Gyllideb ac Arbedion Drafft y Gwasanaethau Cymdeithasol ar gyfer 2020/21 ar 23 Ionawr 2020.

Cymeradwyo cofnodion cyfarfod 19 Rhagfyr, 2019.  Rhoddwyd eglurhad ar gais yr aelodau ar "85% (11/13) yr achosion a archwiliwyd."

Mewn 85% (11/13) o'r achosion a archwiliwyd, roedd y gweithiwr a oruchwyliwyd wedi mynychu o leiaf un sesiwn hyfforddi yn ystod yr un cyfnod ag y cynhaliwyd y tair sesiwn oruchwylio ddiwethaf. O ganlyniad, roedd hyn yn galluogi'r goruchwyliwr/gweithiwr dan oruchwyliaeth i fyfyrio ar sut yr oedd yr hyfforddiant wedi effeithio ar ei arfer yn ystod y sesiynau goruchwylio.

Yn dilyn hynny, cadarnhaodd y Cadeirydd y bydd y llythyr a amlygwyd yng nghofnodion y cyfarfod ar 19 Rhagfyr 2019 (Cofnod Rhif 6 – Diweddariad ar Gynllun Strategol Anhwylder y Sbectrwm Awtistig/Anhwylderau Niwroddatblygiadol (Cynllun Strategol ASD/NDD) yn barod i'w ystyried yn y cyfarfod nesaf.

Derbyniwyd gwybodaeth am Ddata Mesurau Lefel Uchel y Gwasanaethau Plant a Phobl Ifanc a’r Gwasanaethau i Oedolion ar gyfer Cyfnod y 3ydd Chwarter (Ebrill – Rhagfyr 2019) fel y nodir yn yr adroddiad a ddosbarthwyd.

Codwyd y materion canlynol gan yr aelodau:

·        Mae ystadegau salwch hirdymor yn nodi straen fel rheswm - ai oherwydd y gwaith yw hwn neu oherwydd rhesymau personol? Esboniodd swyddogion bod y ddau reswm yn achosi hyn ond os nodir eu bod yn gysylltiedig â'r gwaith, gweithredir proses y cytunwyd arni i reoli a lliniaru hyn.

·        Pam cafwyd cynnydd mewn nifer y gweithwyr asiantaeth yn 2019 o'i gymharu â 2018?  Y rheswm am hyn oedd bod arian ychwanegol yn cael ei dderbyn i gyflogi therapyddion galwedigaethol ychwanegol.

·        Pam mae canran y goruchwyliaethau a gwblhawyd o fewn yr amserlen wedi gostwng? Roedd hyn o ganlyniad i'r swyddi gwag a salwch ychwanegol ond roedd ymarfer ailfodelu yn y gwasanaethau i oedolion yn cael ei gynnal ar hyn o bryd a fyddai'n arwain at liniaru hyn. Byddai cynnig yn cael ei gyflwyno i'r aelodau maes o law.

·        Beth oedd y meini prawf a'r broses ar gyfer ychwanegu/tynnu plentyn oddi ar y gofrestr Amddiffyn Plant, gan ei bod yn ymddangos ei fod wedi cynyddu ychydig. Esboniwyd bod llawer o ffactorau yn cael effaith ar hyn, ac y penodwyd Swyddog Diogelu dynodedig a oedd yn goruchwylio'r holl achosion hyn.  Roedd rhai pobl ifanc a oedd wedi'u symud o'r cartref ac wedi ymgartrefu mewn gofal maeth wedi aros ar gofrestrau amddiffyn plant a chofrestrau derbyn gofal. Yn ogystal, cynhaliwyd adolygiad o achosion dros 12 mis.  Cafodd y penderfyniad i dynnu plentyn/person ifanc o'r gofrestr ei wneud gan banel amlasiantaeth a oedd yn cynnwys addysg, yr heddlu ac unrhyw un sy'n ymwneud â'r achos. Archwilir achosion sydd wedi'u dadgofrestru a chânt eu rhoi yn ôl ar y gofrestr os bydd angen.  Mae Prif Swyddog yr ardal honno hefyd yn monitro cyfradd y newidiadau.

·        Gofynnwyd am eglurhad ynghylch pam nad oedd gan dros hanner yr achosion o'r Gwasanaethau i Oedolion ddadansoddiad clir o'r wybodaeth a rennir, fel y nodwyd yn adroddiad yr archwilwyr.  Cadarnhaodd swyddogion fod hyn o ganlyniad i broses weinyddol a bod gweithdrefn newydd wedi'i rhoi ar waith.

·        Unwaith eto, mewn perthynas ag adroddiad yr archwilwyr, gofynnwyd pam nad oedd rhai ffeiliau'n cynnwys cerdyn meddygol wrth eu derbyn, a oedd yn dangos nad oedd yr wybodaeth hon ar gael yn ystod yr archwiliad neu nad oedd cerdyn cyfeirio'n bodoli, felly byddai angen adolygu hyn mewn polisi. Esboniodd swyddogion y byddent yn gofyn am eglurder gan y bwrdd iechyd sy'n gyfrifol am y cerdyn meddygol ac yn adrodd yn ôl i'r aelodau.

Yn dilyn craffu, cytunwyd i nodi'r adroddiad.

Dewis eitemau priodol o Agenda Bwrdd y Cabinet ar gyfer craffu

cyn penderfynu (amgaeir adroddiadau Bwrdd y Cabinet aa gyfer yr

Aelodau Craffu)

Dewisodd y pwyllgor graffu ar yr eitemau canlynol ar agenda Bwrdd y Cabinet:

 Gwasanaethau Plant a Phobl Ifanc a’r Gwasanaethau i Oedolion – Adroddiad Perfformiad y 3ydd Chwarter (Ebrill 2019 – Rhagfyr 2019)

Cafodd y pwyllgor drosolwg o Berfformiad y Gwasanaethau Plant a Phobl Ifanc a’r Gwasanaethau i Oedolion – y 3ydd Chwarter (Ebrill – Rhagfyr 2019) fel y nodir yn yr adroddiad a ddosbarthwyd.

Codwyd y materion canlynol gan yr aelodau:

·        Pa gynnydd y mae Opsiynau Tai neu'r Swyddog Ataliol wedi'i wneud gyda Landlordiaid Cymdeithasol Cofrestredig (LCC).  Mae'r data'n nodi mewn 140 o achosion na rwystrwyd pobl rhag dod yn ddigartref.  Dywedodd swyddogion eu bod yn cysylltu â landlordiaid cymdeithasol a bod cyfarfodydd rheolaidd yn cael eu cynnal gyda Tai Tarian a Pobl ond y broblem oedd bod diffyg darpariaeth llety 1 ystafell wely.  Nododd yr aelodau fod cyllid ar gael am flwyddyn yn unig ar gyfer y Swyddog Ataliol.  Esboniodd swyddogion y byddai'n cael ei adolygu ar ddiwedd y cyfnod hwnnw ac y byddant yn ceisio cyllid ychwanegol i barhau â'r gwaith.

·        Gofynnwyd pam y mae'r ffordd y cafodd data ei gofnodi wedi newid.  Esboniodd y swyddog bod y rhain yn ddangosyddion y mae Llywodraeth Cymru’n gofyn am wybodaeth amdanynt.  Mae gan Gastell-nedd Port Talbot ei ddata ei hun y mae swyddogion yn ei fonitro.

·        Yn dilyn hyn, gofynnwyd a oedd unrhyw ddata ar gael ar nifer yr asesiadau gofalwyr y gofynnir amdanynt.  Bydd y swyddogion yn ymchwilio ac yn rhoi'r wybodaeth ddiweddaraf i'r aelodau.

Yn dilyn craffu, cytunwyd i nodi'r adroddiad.

Strategaeth Gofalwyr Castell-nedd Port Talbot

Cafodd yr aelodau drosolwg o Strategaeth Gofalwyr Castell-nedd Port Talbot fel y nodir yn yr adroddiad a ddosbarthwyd.

Roedd y pwyllgor yn falch bod fersiwn hawdd ei ddarllen wedi'i chynnwys yn y papurau ar gyfer y cyfarfod heddiw ond gofynnodd i fersiwn Saesneg syml gael ei chynhyrchu yn y dyfodol.  Roedd geiriau o hyd yn y fersiwn hawdd ei ddarllen yr oedd angen eu hesbonio ymhellach.

Gofynnwyd am eglurder ynglŷn â'r hyn a olygir gan y datganiad "Identify young people who need a transition assessment but are not receiving children’s services".  Esboniodd swyddogion, pan fydd person ifanc yn dod yn oedolyn, fod angen asesiad gwahanol yn ystod y cyfnod pontio.

Cafwyd trafodaeth ar yr hyn y gellid ei wneud i nodi mwy o ofalwyr yng Nghastell-nedd Port Talbot, gan y nodir yn yr adroddiad mai dim ond 441 o'r 20,000 oedd wedi'u nodi.   Esboniodd swyddogion fod amrywiaeth o resymau pam roedd y ffigur hwn yn isel.  Nid yw nifer sylweddol o ofalwyr am i'r Gwasanaethau Cymdeithasol ymwneud â nhw.  Nid yw rhai yn ymwybodol o'r cymorth sydd ar gael nac yn ei ddeall.  Gwnaed llawer o waith i gynyddu ymwybyddiaeth a byddai hyn yn parhau fel un o flaenoriaethau'r gwasanaeth ond nododd yr aelodau nad oedd unrhyw gyllid ar gael gan Lywodraeth Cymru i gefnogi hyn. 

Esboniodd swyddogion hefyd y gwnaed llawer o waith gyda'r Gwasanaeth Ieuenctid ac ysgolion i nodi gofalwyr ifanc nad ydynt yn nodi'u hunain.  Gofynnwyd  ...  Gweld y cofnodion lawn ar gyfer eitem 4.

Nodi'r Blaenraglen Waith ar gyfer 2019/2020.

(Unrhyw eitemau brys (boed yn gyhoeddus neu wedi’u heithrio) yn

ol disgresiwn y Cadeirydd yn unol ag Adran 100B (4) (b) o Ddeddf

Llywodraeth Leol 1972)

Gyda chaniatâd y Cadeirydd, codwyd y mater canlynol fel eitem frys i'w thrafod yn ystod cyfarfod heddiw yn unol ag Adran 100A(4) a (5) o Ddeddf Llywodraeth Leol 1972.

Rheswm:

Oherwydd yr elfen amser.

Y diweddaraf am Coronafeirws

Rhoddodd Cyfarwyddwr y Gwasanaethau Cymdeithasol, Iechyd a Thai ddiweddariad llafar i'r aelodau ar y sefyllfa bresennol a pha fesurau oedd eu hangen i alluogi darpariaeth gwasanaethau yn ystod yr argyfwng hwn.

Mynediad i gyfarfodydd i benderfynu a ddylid gwahardd y cyhoedd o'r eitem ganlynol yn unol ag Is-adran 100a(4) a (5) Deddf Llywodraeth Leol 1972 a'r paragraffau eithriedig perthnasol o Ran 4 Atodlen 12a y Ddeddf uchod

Derbyniodd y pwyllgor drosolwg o'r Sefyllfa Taliadau Uniongyrchol fel y nodir yn yr adroddiad a ddosbarthwyd yn breifat.

Cafodd yr aelodau'r wybodaeth ddiweddaraf am y Gwasanaeth Taliadau Uniongyrchol. Roedd yn cynnwys y broses o wneud cais am Daliadau Uniongyrchol, monitro'r broses a data, monitro perfformiad a'r gwersi a ddysgwyd ac astudiaethau achos.

Yn dilyn craffu, cytunwyd i nodi'r adroddiad.