Agenda item

Dewis eitemau priodol o Agenda Bwrdd y Cabinet ar gyfer craffu

cyn penderfynu (amgaeir adroddiadau Bwrdd y Cabinet aa gyfer yr

Aelodau Craffu)

Dewisodd y pwyllgor graffu ar yr eitemau canlynol ar agenda Bwrdd y Cabinet:

 

 Gwasanaethau Plant a Phobl Ifanc a’r Gwasanaethau i Oedolion – Adroddiad Perfformiad y 3ydd Chwarter (Ebrill 2019 – Rhagfyr 2019)

 

Cafodd y pwyllgor drosolwg o Berfformiad y Gwasanaethau Plant a Phobl Ifanc a’r Gwasanaethau i Oedolion – y 3ydd Chwarter (Ebrill – Rhagfyr 2019) fel y nodir yn yr adroddiad a ddosbarthwyd.

 

Codwyd y materion canlynol gan yr aelodau:

 

·        Pa gynnydd y mae Opsiynau Tai neu'r Swyddog Ataliol wedi'i wneud gyda Landlordiaid Cymdeithasol Cofrestredig (LCC).  Mae'r data'n nodi mewn 140 o achosion na rwystrwyd pobl rhag dod yn ddigartref.  Dywedodd swyddogion eu bod yn cysylltu â landlordiaid cymdeithasol a bod cyfarfodydd rheolaidd yn cael eu cynnal gyda Tai Tarian a Pobl ond y broblem oedd bod diffyg darpariaeth llety 1 ystafell wely.  Nododd yr aelodau fod cyllid ar gael am flwyddyn yn unig ar gyfer y Swyddog Ataliol.  Esboniodd swyddogion y byddai'n cael ei adolygu ar ddiwedd y cyfnod hwnnw ac y byddant yn ceisio cyllid ychwanegol i barhau â'r gwaith.

·        Gofynnwyd pam y mae'r ffordd y cafodd data ei gofnodi wedi newid.  Esboniodd y swyddog bod y rhain yn ddangosyddion y mae Llywodraeth Cymru’n gofyn am wybodaeth amdanynt.  Mae gan Gastell-nedd Port Talbot ei ddata ei hun y mae swyddogion yn ei fonitro.

·        Yn dilyn hyn, gofynnwyd a oedd unrhyw ddata ar gael ar nifer yr asesiadau gofalwyr y gofynnir amdanynt.  Bydd y swyddogion yn ymchwilio ac yn rhoi'r wybodaeth ddiweddaraf i'r aelodau.

 

Yn dilyn craffu, cytunwyd i nodi'r adroddiad.

 

Strategaeth Gofalwyr Castell-nedd Port Talbot

 

Cafodd yr aelodau drosolwg o Strategaeth Gofalwyr Castell-nedd Port Talbot fel y nodir yn yr adroddiad a ddosbarthwyd.

 

Roedd y pwyllgor yn falch bod fersiwn hawdd ei ddarllen wedi'i chynnwys yn y papurau ar gyfer y cyfarfod heddiw ond gofynnodd i fersiwn Saesneg syml gael ei chynhyrchu yn y dyfodol.  Roedd geiriau o hyd yn y fersiwn hawdd ei ddarllen yr oedd angen eu hesbonio ymhellach.

 

Gofynnwyd am eglurder ynglŷn â'r hyn a olygir gan y datganiad "Identify young people who need a transition assessment but are not receiving children’s services".  Esboniodd swyddogion, pan fydd person ifanc yn dod yn oedolyn, fod angen asesiad gwahanol yn ystod y cyfnod pontio.

 

Cafwyd trafodaeth ar yr hyn y gellid ei wneud i nodi mwy o ofalwyr yng Nghastell-nedd Port Talbot, gan y nodir yn yr adroddiad mai dim ond 441 o'r 20,000 oedd wedi'u nodi.   Esboniodd swyddogion fod amrywiaeth o resymau pam roedd y ffigur hwn yn isel.  Nid yw nifer sylweddol o ofalwyr am i'r Gwasanaethau Cymdeithasol ymwneud â nhw.  Nid yw rhai yn ymwybodol o'r cymorth sydd ar gael nac yn ei ddeall.  Gwnaed llawer o waith i gynyddu ymwybyddiaeth a byddai hyn yn parhau fel un o flaenoriaethau'r gwasanaeth ond nododd yr aelodau nad oedd unrhyw gyllid ar gael gan Lywodraeth Cymru i gefnogi hyn. 

 

Esboniodd swyddogion hefyd y gwnaed llawer o waith gyda'r Gwasanaeth Ieuenctid ac ysgolion i nodi gofalwyr ifanc nad ydynt yn nodi'u hunain.  Gofynnwyd i aelodau a oedd yn gweithredu fel llywodraethwyr ysgol mewn cyfarfodydd llywodraethwyr ysgol ganolbwyntio ar y mater hwn a nodi faint o ofalwyr sy'n blant sydd yn eu hysgolion.  

 

Yn dilyn y broses graffu, roedd y pwyllgor yn gefnogol o'r cynigion i'w hystyried gan Fwrdd y Cabinet.

 

Diweddariad Blynyddol ar y Cynllun Comisiynu Lleol Cefnogi Pobl

 

Derbyniwyd trosolwg o Gynllun Comisiynu Lleol Cefnogi Pobl 2017/20 fel y nodir yn yr adroddiad a ddosbarthwyd.

 

Mynegodd yr aelodau bryder oherwydd er nad oedd y Grant Cefnogi Tai wedi gostwng, nid oedd wedi newid dros y 4 blynedd diwethaf ac arweiniodd hynny at ostyngiad wrth ystyried chwyddiant.  Ar hyn o bryd, roedd Llywodraeth Cymru’n edrych ar y meini prawf sy'n ymwneud â'r Grant Cefnogi Tai a allai effeithio ar CBSCNPT.  Cafwyd trafodaeth ynghylch y ffaith bod angen rhoi gwybod i Lywodraeth Cymru am hyn.

 

Cafwyd trafodaeth bellach ynghylch pa gymorth oedd ar gael i helpu defnyddwyr gwasanaeth i gael Credyd Cynhwysol. Yn ogystal, roedd y ffurflen gais bellach ar-lein, a oedd yn ei gwneud yn anos i rai ei chwblhau. Esboniodd swyddogion fod yr Adran Gwaith a Phensiynau yn gweithio gyda'r Cydlynwyr Ardaloedd Lleol i helpu i ddarparu cymorth i bobl y mae ei angen arnynt.

 

Gofynnodd yr aelodau beth oedd ar waith i gefnogi pobl â phroblemau iechyd meddwl os nad oedd cwnsela ar gael.  Roedd Pennaeth y Gwasanaethau i Oedolion yn trafod hyn gyda'r Gwasanaeth Iechyd ar hyn o bryd.

 

Yn dilyn craffu, cytunwyd i nodi'r adroddiad.

 

Polisi Gwahanu Hillside

 

Cafodd y pwyllgor drosolwg o Bolisi Gwahanu Hillside fel y nodir yn yr adroddiad a ddosbarthwyd.

 

Llongyfarchodd yr aelodau'r swyddogion ar bolisi rhagorol ac ystyriol.

 

Yn ogystal, roedd yr aelodau'n falch o sefydlu'r Bwrdd Diogelu. 

 

Yn dilyn y broses graffu, roedd y pwyllgor yn gefnogol o'r cynigion i'w hystyried gan Fwrdd y Cabinet.