Agenda item

Rhoddodd Pennaeth y Gwasanaethau Cyfreithiol a Democrataidd drosolwg o'r adroddiad, fel y'i cynhwysir yn y pecyn agenda.

Sylwodd yr aelodau fod aelodau etholedig wedi derbyn nifer o ddeisebau ar-lein gan y cyhoedd; fodd bynnag, nid oes yr un o'r rhain wedi bod yn E-Ddeisebau’r awdurdod lleol. Nodwyd y byddai unrhyw E-Ddeiseb sy'n derbyn dros bum cant o lofnodion yn ysgogi dadl. Gofynnodd yr aelodau am wybodaeth ychwanegol ynghylch y broses hon.

Cadarnhaodd Pennaeth y Gwasanaethau Cyfreithiol a Democrataidd y byddai unrhyw ddeiseb sy'n bodloni'r trothwy yn cael ei hystyried gan y cyngor llawn ar gyfer dadl gyhoeddus. Byddai trafodaeth wedi'i hamseru'n cael ei chynnal yn y cyngor er mwyn ystyried yr eitem. Gall Aelodau'r Cabinet neu bwyllgorau craffu hyrwyddo materion o fewn eu fforymau priodol, os ystyrir bod hyn yn briodol. Mewn rhai achosion, gallai'r ddadl arwain at y Cabinet yn cyfarwyddo swyddogion i ddarparu manylion ychwanegol. Mae'r broses E-ddeiseb yn sicrhau tryloywder ynghylch y mater dan sylw ac yn cynnig cyfle i drafod camau gweithredu a chytuno arnynt er mwyn mynd i'r afael â'r pwyntiau a godir yn y ddeiseb.

Nododd yr aelodau fod deiseb ar-lein ddiweddar wedi casglu dros 4,500 o lofnodion, drwy lwyfan trydydd parti. Pe bai cynllun E-ddeiseb yr awdurdod lleol wedi cael ei ddefnyddio, byddai hyn wedi ennyn dadl.

Cyfeiriodd yr aelodau at y tair deiseb a grybwyllwyd yn yr adroddiad a nodwyd nad oedd yr un ohonynt wedi cyrraedd y trothwy ar gyfer ymateb. Gofynnodd yr aelodau pa gamau a gymerwyd yn yr amgylchiadau hynny, ac a yw'r cyhoedd yn cael gwybod am ffyrdd amgen o gyfleu eu barn.

Cadarnhaodd Pennaeth y Gwasanaethau Cyfreithiol a Democrataidd fod y tair deiseb a grybwyllir yn yr adroddiad wedi sbarduno ymateb gan y Pennaeth Gwasanaeth. Ystyriodd y Pennaeth Gwasanaeth y cais ac esboniodd pam y cymerwyd y ffordd o weithredu honno. Cyhoeddir copïau o'r ymatebion ar wefan y cyngor sy'n hygyrch i'r cyhoedd.

Gofynnodd yr aelodau a oes cyhoeddusrwydd yn cael ei roi i'r ffaith bod y cyhoedd yn gallu gofyn

cwestiynau mewn cyfarfodydd.

Dywedodd Pennaeth y Gwasanaethau Cyfreithiol a Democrataidd wrth yr aelodau fod cyfranogiad y cyhoedd mewn cyfarfodydd yn cael ei hyrwyddo gymaint â phosib. Roedd angen mwyafu'r potensial i ddefnyddio gwahanol fforymau ar gyfer ymgysylltu. Gallai hyrwyddo'r gwahanol elfennau hyn ymhellach er mwyn annog cyfranogiad y cyhoedd mewn prosesau democrataidd fod yn ffocws posib i Bwyllgor y Gwasanaethau Democrataidd. Darperir rhagor o wybodaeth am siarad cyhoeddus dan eitem chwech ar yr agenda.

Cyfeiriodd yr aelodau at baragraff 23 o'r adroddiad gan ofyn am eglurhad ar yr agweddau ariannol.

Dywedodd Pennaeth y Gwasanaethau Cyfreithiol a Democrataidd wrth yr aelodau fod disgwyl i oblygiadau ariannol derbyn deisebau fod yn fach. Fodd bynnag, efallai bydd costau achlysurol ar gyfer gwasanaethau cyfieithu neu addasiadau hygyrchedd. Mae'r cyngor yn ymwybodol o'r costau posib hyn a bydd yn eu monitro yn ôl yr angen i sicrhau cynwysoldeb mewn cyfarfodydd.

Penderfyniad: Argymhellir bod aelodau'n ystyried cynllun deisebau presennol y cyngor ac yn tynnu sylw at unrhyw newidiadau y maent yn teimlo y dylid eu hystyried.