Agenda item

Hysbyswyd yr Aelodau fod Cyngor Bwrdeistref Castell-nedd Port Talbot wedi llwyddo i gyflawni Lefel 2 Cynllun Meincnodi Hyderus o Ofalwyr Employers for Carers (wedi'i gyflawni).

Nodwyd bod yr Aelodau wedi cymeradwyo aelodaeth tanysgrifiad y Cyngor i Employers for Carers  yn 2022; roedd swyddogion ar draws y Tîm Pobl a Datblygu Sefydliadol wedi bod yn gweithio i roi trefniadau'r Cyngor ar waith er mwyn cefnogi gweithwyr â chanddynt gyfrifoldebau gofalu y tu allan i'r gwaith. Amlygodd swyddogion fod y trefniadau wedi'u cyflwyno ar gyfer asesiad, ac o ganlyniad roeddent wedi cyrraedd meincnod Lefel 2 (wedi’i gyflawni). Nodwyd bod swyddogion yn bwriadu parhau i adeiladu ar y gwaith hwn.

Cyfeiriodd swyddogion at yr ystod o dystiolaeth a gyflwynwyd i'w hystyried, yr oedd peth o'r dystiolaeth hon yn cynnwys:

·        Trefniadau cyfathrebu ar gyfer gweithwyr a oedd yn ofalwyr ac ymrwymiad y Cyngor i gefnogi gofalwyr yn y gweithlu.

·        Gwobr Gofalwyr Cymru - Roedd Gofal Cartref wedi llwyddo i sicrhau'r wobr cydnabyddiaeth ar gyfer  Rheolwr Llinell yn y Gwobrau Wythnos Gofalwyr a drefnir gan Gofalwyr Cymru am y gefnogaeth barhaus a roddir i weithwyr. Roedd hyn yn dangos y gefnogaeth bwrpasol maent yn ei darparu.

·        Cyflwyniadau i arddangos bod ystod o bobl, gan gynnwys Rheolwyr Llinell, wedi cael eu briffio i sicrhau eu bod yn ymwybodol o sut i gefnogi gofalwyr yn y gweithlu.

·        Arolwg staff gofalwyr er mwyn cael gwybodaeth hanfodol am ba gymorth sydd ei angen arnynt a beth arall y gallai'r Cyngor ei wneud i'w helpu.

·        Ymgyrch i recriwtio Hyrwyddwyr Gofalwyr, a oedd yn gallu cyfeirio gofalwyr at lwybrau cymorth a chynyddu ymwybyddiaeth.

·        Sesiynau galw heibio ar gyfer Diwrnod Hawliau Gofalwyr i gynyddu ymwybyddiaeth o'r gefnogaeth sydd ar gael.

·        Datblygu sianel gofalwyr Viva Engage, sy'n hyrwyddo hunanymwybyddiaeth a deunyddiau cymorth yn wythnosol.

·        Sut roedd Employers for Carers wedi'i gynnwys yn y broses cynefino/sefydlu ar gyfer dechreuwyr newydd.

Amlygwyd bod y meini prawf ar gyfer meincnodi yn ymwneud yn bennaf â chynyddu ymwybyddiaeth, a sicrhau bod pobl sy'n gallu cefnogi gofalwyr yn y gweithle yn gwybod pa gymorth i'w ddarparu, a bod pobl â chyfrifoldebau gofalu yn gwybod ble i fynd pan roedd angen y cymorth hwnnw arnynt.

Gofynnodd yr Aelodau pa gamau gweithredu ychwanegol oedd eu hangen er mwyn cyrraedd y lefel nesaf. Darparodd swyddogion y rhestr ganlynol ar gyfer cyflawni Lefel 3:

• Dangos dulliau creadigol ac arloesol o gefnogi ac ymgysylltu â gofalwyr fel rhan o ddiwylliant gweithle agored a chadarnhaol.
• Cynnwys gofalwyr wrth ddatblygu polisïau/canllawiau a phrosesau i gefnogi gofalwyr yn y gweithle.
• Darparu ystod eang o wybodaeth a chymorth i ofalwyr ar bob cam o'u taith ofalu.
• Cefnogi gofalwyr ar bob cam o gyflogaeth, o recriwtio i ddychwelyd i'r gweithle, neu adael y gweithle.
• Galluogi ac annog gofalwyr i dderbyn cymorth ymarferol o'r tu mewn a'r tu allan i'r sefydliad.
• Hyfforddi rheolwyr i gefnogi a chadw gofalwyr yn effeithiol.
• Cyfathrebu'n rheolaidd a hyrwyddo materion gofalu/gofalwyr trwy'r sefydliad gan gynnwys trwy reolwyr llinell.
• Hyrwyddo gofalu/gofalwyr yn fewnol ac yn allanol, gan gynnwys arwain trwy esiampl yn eich gweithle ac i gyflogwyr eraill neu eich cadwyn gyflenwi.

Llongyfarchodd y Pwyllgor y Tîm ar eu cyflawniadau.

PENDERFYNWYD:

Nodi’r adroddiad.