Agenda item

Gwnaeth swyddogion hysbysu'r aelodau o gamgymeriad yn adran effeithiau ariannol yr adroddiad, ac esboniwyd bod y gost sy'n gysylltiedig â gosod bolardiau i atal mynediad cerbydau yn £2076 nid £1000.

 

Esboniodd swyddogion y bydd ymgynghoriad â'r Bwrdd Prosiect Diogelwch Cymunedol yn cael ei gynnal yn ystod y cyfnod prawf os caiff y peilot ei gefnogi gan yr aelodau, i ganfod a oes unrhyw effeithiau anhrefn yn gysylltiedig â'r cynllun peilot.

Esboniodd swyddogion y bydd ymgynghoriad â rhanddeiliaid parciau a gerddi megis Cyfeillion Parc Jersey yn ystod y dwy i dair wythnos cyn dechrau'r cyfnod prawf ym mis Rhagfyr.

Roedd yr aelodau'n poeni bod yr adroddiad yn dweud y gallai fod yn rhaid i swyddogion ymgysylltu â phartneriaid ynghylch gweithwyr rhyw a chamddefnyddio cyffuriau. Roeddent yn teimlo bod hyn yn rhoi'r argraff bod y cyngor yn rhagweld y gallai'r problemau godi yn y dyfodol os yw'r parciau'n cael eu gadael ar agor gyda goleuadau cyfyngedig a gallent ddod yn lleoedd lle bydd pobl yn ymgynnull yn hwyr yn y nos.

Dywedodd swyddogion fod un unigolyn yn ymgymryd â'r dasg hon bob dydd, ond oherwydd diffyg adnoddau o ganlyniad i salwch, mae yna gyfnod prawf answyddogol eisoes wedi bod ar waith o ran peidio â chau'r parciau. Rhoddwyd gwybod i'r aelodau fod swyddogion yn trefnu goramser lle bo hynny'n bosib ond nid yw hyn bob amser yn bosib.

Rhoddwyd gwybod i'r Aelodau nad oes unrhyw wybodaeth wedi cyrraedd am waith rhyw drwy eu gwaith gyda'r heddlu a'r Swyddogion Cymorth Cymunedol lleol. Mae swyddogion yn teimlo'u bod wedi bod yn canolbwyntio'n fwy ar ymddygiad gwrthgymdeithasol. Mae gan y cyngor ddyletswydd o ran trosedd ac anhrefn a'r risg sy'n gysylltiedig â hynny a dyna pam eu bod wedi ei nodi yn yr adroddiad.

Bydd swyddogion yn gweithio'n agos gyda'r tîm Diogelwch Cymunedol i nodi problemau posib a allai ddod i'r amlwg, ond nid yw swyddogion yn rhagweld y bydd y rhain yn dod yn broblemau.

Dywedodd swyddogion y byddant yn siarad â'r Tîm Diogelwch Cymunedol ac maent yn bwriadu gwneud cyflwyniad yn ystod cyfarfod y bwrdd prosiect diogelwch cymunedol ar 5 Rhagfyr i ddweud wrth yr asiantaethau allanol eraill am fanylion y cynllun peilot. Esboniodd swyddogion hefyd tua diwedd y cyfnod prawf fydd cyfarfod bwrdd y prosiect ar 11 Mawrth, ac maent am fod yn bresennol i ofyn am adborth ac i nodi a oes unrhyw effeithiau sy'n gysylltiedig â'r newidiadau. Mae swyddogion hefyd yn dymuno rhoi cyfrifoldeb ar yr asiantaethau allanol eraill i feddwl am unrhyw fesurau y gallent eu cyflwyno i liniaru unrhyw effeithiau. Bydd swyddogion wedyn yn dod â hynny yn ôl mewn adroddiad pellach i'r aelodau ei ystyried.

Gofynnodd yr Aelodau am gost gosod y bolardiau a gofynnwyd a oes gan swyddogion unrhyw syniad o faint o folardiau y bydd y cyllid hwn yn talu amdanynt a faint y gellid eu gosod ym mhob lleoliad? Rhoddodd yr aelodau enghraifft o barc Tollgate lle mae ganddynt 3 giât sy'n cael eu cadw ar agor a allai ddarparu mynediad i gerbydau a gofynnwyd a fyddai gan y tri giât folardiau.

Dywedodd swyddogion fod angen cyfanswm o 12 o folardiau yn y parciau. Esboniodd swyddogion mai'r pris oedd £170 yr un a byddai staff y cyngor yn mynd i'w gosod sy'n lleihau'r gost. Gall swyddogion roi'r union ffigurau i aelodau.

Nododd yr Aelodau nad yw gatiau Parc y Gnoll wedi eu cau ers tua 5, 6 neu 7 mlynedd ac er bod rhai problemau yno, nad ydynt yn rhai mawr. Teimlai'r aelodau nad oedd angen cadw'r giatiau ar gau dros nos oherwydd os bydd pobl am fynd i'r parciau, gallent wneud hynny pe bai giatiau yno neu beidio.

 

Nododd swyddogion nad yw'r Gnoll wedi'i gynnwys yn y cynnig gan fod gormod o ffyrdd i'w gyrraedd ac nad oes modd atal pobl rhag mynd i mewn i'r parc y tu allan i oriau agor. Dywedodd swyddogion fod cloi'r parciau'n ffordd o geisio atal pobl rhag mynd i mewn i'r parciau y tu allan i oriau agor ond mae anawsterau difrifol o ran y staff sy'n ymgymryd â'r rôl hon ac oherwydd y gyllideb sydd ar gael.

Dywedodd swyddogion fod nifer o achlysuron wedi bod lle nad yw'r staff wedi'u cloi oherwydd mae pobl neu grwpiau wedi bod yn y parc o hyd. Er bod polisi'r cyngor yn nodi bod angen cloi parciau, bu llawer o adegau lle nad ydynt wedi cael eu cloi dros nos.

 

Nododd swyddogion fod aelodau wedi codi diffyg cloi parciau fel pryder, ond nad oes llawer o gamau y gallant eu cymryd i ddatrys hynny'n gyflym.

 

Dywedodd aelod, yn ei brofiad blaenorol o fod yn swyddog heddlu, os ydych yn cloi ardal, mae'n fwy tebygol y bydd pobl yn torri i mewn gan ei fod yn fwy deniadol i bobl sydd am ymddwyn yn wrthgymdeithasol neu ddefnyddio cyffuriau gan eu bod am fod mewn ardal lle na all pobl ddod o hyd iddynt, a byddant yn torri trwy ffens neu'n dringo drosti. Teimlai'r aelodau nad yw gadael gatiau ar agor yn mynd i gynyddu unrhyw ymddygiad gwrthgymdeithasol nac unrhyw gamddefnydd.

 

Roedd aelodau'n teimlo ei fod yn bwysig sicrhau eich bod gan gatiau mawr folardiau oherwydd mae beiciau modur anghyfreithlon yn dod i mewn i'r ardal ac yn dinistrio'r tir.

 

Dywedodd swyddogion y byddant yn mynd yn ôl ac yn gwirio gyda'r swyddogion y bydd y bolardiau yr argymhellir eu gosod fel rhan o'r cyfnod prawf yn atal cerbydau fel beiciau modur anghyfreithlon rhag mynd i mewn i'r parciau hefyd. Os na, byddant yn ystyried naill ai rhan o'r cyfnod prawf, neu rywbeth y bydd y cynllun prawf yn tynnu sylw ato, fel problem.

 

Dywedodd y cadeirydd fod parc yn ei ward lle nad yw'r holl gatiau wedi'u cloi'n llawn ers cryn amser ac mae rhywfaint o ymddygiad gwrthgymdeithasol, ond mae'n tueddu i fod oherwydd mae pobl yn ymgynnull o amgylch yr un giât sydd heb gael ei chloi.

 

Roedd y cadeirydd hefyd yn teimlo os ydych chi'n cloi'r parciau, bydd pobl yn parhau i ddod o hyd i ffordd i mewn os ydyn nhw am fynd i mewn. Teimlai'r cadeirydd, drwy annog defnydd cyfreithlon, megis pobl yn cerdded drwy'r parc fel llwybr byr neu gerdded y ci, rydych chi'n mynd i atal yr ymddygiad gwrthgymdeithasol.

Teimlai'r aelodau y byddai rhywfaint o oleuadau ar hyd y llwybrau troed yn y parciau yn ddelfrydol pe bai parciau'n cael eu gadael ar agor drwy'r nos er eu bod yn nodi cyd-destun pwysau cyllidebol sy'n wynebu'r cyngor ar hyn o bryd.

 

Teimlai'r aelodau, pe bai cyfleoedd ariannu i roi rhai bolardiau lefel isel mewn ardaloedd lle gallai fod llwybr byr trwy'r parc sy'n cael ei ddefnyddio'n aml, y byddai'n debygol o atal yr elfennau ymddygiad gwrthgymdeithasol ymhellach.

 

Esboniodd swyddogion na fyddai'r cyfnod prawf a gynhelir ar gyfer yr adroddiad pylu a lleihau goleuadau ar hyd y llwybr yn effeithio ar y parciau.

 

Esboniodd swyddogion nad oes unrhyw argymhellion yn rhan o'r adroddiad sy'n sôn am osod goleuadau ychwanegol, ond gallant edrych ar hyn o ran cyfleoedd cyllido.

 

Dywedodd yr aelodau fod cynnyrch gwahanol yn bodoli sy'n gallu bod yn llai costus na chynigion goleuo strydoedd llawn.

Roedd aelodau'n teimlo pe bai bolardiau'n cael eu gosod byddai angen sicrhau bod cerbydau brys yn gallu cael mynediad i'r parciau.

Dywedodd swyddogion fod gwahanol fathau o folardiau ond y math y byddent yn eu gosod fyddai bolardiau y mae modd eu gostwng fel y gellir eu gostwng yn ystod y dydd a byddant yn gweithio gyda'r gwasanaethau brys. Bydd swyddogion yn codi hyn fel rhan o fwrdd y Bartneriaeth Diogelwch Cymunedol hefyd.

 

Gofynnodd y cadeirydd a fydd ymgysylltiad â'r cyhoedd, yn enwedig pobl sy'n byw gerllaw, ond hefyd pobl a allai fod am ddefnyddio'r parciau.

 

Cadarnhaodd swyddogion os caiff y cyfnod prawf ei gymeradwyo gan aelodau, yna bydd gan swyddogion ychydig o amser rhwng nawr a dechrau'r cyfnod prawf i weithio gyda thîm y cyfryngau fel y gallant gyhoeddi rhywbeth i roi gwybod i bobl am yr hyn sy'n digwydd ac i ofyn am eu hymateb hefyd. Bydd swyddogion yn siarad gyda thîm y cyfryngau am y ffordd orau o wneud hynny.

 

Yn dilyn gwaith craffu, cyflwynwyd diwygiad. Cefnogwyd yr argymhelliad diwygiedig fel y nodir isod i fynd gerbron y Cabinet.

 

Cymeradwyo'r cynnig i gynnal cynllun peilot swyddogol i beidio â chyfyngu mynediad cerddwyr i'r parciau a'r gerddi a restrir yn Atodiad A am gyfnod o 4 mis yn dechrau 1 Rhagfyr 2024. Adroddir yn ôl am ganlyniad y cynllun peilot a byddant yn cynnwys ymgysylltiad â'r cyhoedd.