Agenda item

Dywedodd swyddogion wrth yr aelodau fod cyfarfod arbennig posib wedi'i ychwanegu at y rhaglen waith ar gyfer mis Rhagfyr mewn perthynas â'r gwaith sydd wedi’i gynllunio ar gyfer Theatr y Dywysoges Frenhinol. Bydd y gwaith yn cael effaith sylweddol ar gyfleusterau'r aelodau gan gynnwys mannau parcio i'r aelodau, argaeledd ystafelloedd pwyllgorau, siambr y Cyngor a'r Ganolfan Ddinesig. Mae gan Bwyllgor y Gwasanaethau Democrataidd gylch gwaith ar gyfer cyfleusterau aelodau a bydd y pwyllgor yn cael ei gynnwys wrth gynllunio unrhyw fesurau lliniaru angenrheidiol. Cadarnhaodd swyddogion fod trafodaethau'n parhau â chydweithwyr yng Nghyfarwyddiaeth yr Amgylchedd, i nodi canlyniadau'r gwaith cynlluniedig; gan nad yw llawer o ffactorau'n hysbys ar hyn o bryd, nid yw'n glir pa fesurau lliniaru y gall fod eu hangen.

Cododd yr aelodau bryder y gallai'r gwaith rwystro aelodau rhag mynd i gyfarfodydd a defnyddio cyfleusterau'n bersonol. Mae'n bwysig sicrhau bod dewisiadau amgen priodol ar gael ar gyfer cyfarfodydd a gweithgareddau.

Cytunodd Pennaeth y Gwasanaethau Cyfreithiol a Democrataidd fod hwn yn ystyriaeth allweddol a bod angen sicrhau y nodir ystafelloedd/cyfleusterau eraill addas sy'n bodloni gofynion cyfreithiol. Cynllun wrth gefn posib fyddai defnyddio'r ystafelloedd cyflwyno a chynadledda ar y llawr gwaelod ar gyfer cyfarfodydd craffu gyda'r siambr yn cael ei chadw ar gyfer cyfarfodydd llawn y Cyngor, gyda'r gwaith yn peidio am barhad y cyfarfod. Y nod yw lleihau'r effaith ar fusnes y Cyngor cymaint â phosib.

Gofynnodd yr aelodau pryd y byddai'r pwyllgor yn cael y cyfle i fynegi barn ar y trefniadau craffu newydd?

Dywedodd Pennaeth y Gwasanaethau Cyfreithiol a Democrataidd wrth aelodau nad oedd yr adolygiad craffu wedi'i gynnwys eto ar gyfer dyddiad penodol. Bydd cyfarfod gyda chadeiryddion craffu ac is-gadeiryddion yn cael ei gynnal yn fuan i gasglu eu barn. Mae potensial i ailedrych ar y system gydag Archwilio Cymru’n darparu trosolwg annibynnol. Ymgynghorir â Phwyllgor y Gwasanaethau Democrataidd a bydd yn rhan o'r prosesau adolygu. Efallai bydd angen cynnal cyfarfod arbennig os oes angen gwahodd aelodau eraill y pwyllgor, er mwyn sicrhau bod y safbwyntiau ehangaf yn cael eu cofnodi.

Nodwyd y Flaenraglen Waith.