Agenda item

Cyflwynodd swyddogion adroddiad a oedd yn gofyn am gymeradwyaeth ar gyfer cynnwys y rhestr o gynigion cyfalaf sbarduno yn yr Achos Busnes Llawn ar gyfer y Porthladd Rhydd Celtaidd.

Rhoddodd Prif Weithredwr Cyngor Sir Penfro drosolwg o'r cefndir o ran ymdrech y Porthladd Rhydd hyd yn hyn, a'r camau nesaf wrth symud ymlaen â'r Achos Busnes Amlinellol a'r Achos Busnes Llawn.

Esboniwyd bod yr Achos Busnes Amlinellol wedi cael ei gymeradwyo gan y ddau Awdurdod Lleol yn flaenorol a'i gyflwyno i Lywodraeth y DU; roedd swyddogion wedi disgwyl derbyn adborth a phenderfyniad i gymeradwyo'r Achos Busnes Amlinellol erbyn hyn, fodd bynnag roedd yr Etholiad Cyffredinol sydyn a gynhaliwyd ym mis Gorffennaf 2024 wedi amharu ar yr amserlen. Dywedwyd wrth yr Aelodau nad oedd y broses hon wedi'i chwblhau eto.

O ran yr Achos Busnes Llawn, roedd Llywodraeth y DU wedi gofyn am gyflwyno'r achos yn gynt, yn gynnar ym mis Hydref 2024; roedd hyn er mwyn ceisio sicrhau bod y broses hon wedi'i chwblhau erbyn diwedd mis Hydref 2024. Nodwyd y bydd Aelodau'r ddau Awdurdod Lleol yn derbyn yr Achos Busnes Llawn drafft dros yr wythnosau nesaf i'w adolygu a phenderfynu arno cyn ei gyflwyno'n derfynol i Lywodraeth y DU.

Hysbyswyd y Pwyllgor fod gofyniad o fewn yr Achos Busnes Llawn i gyflwyno cynigion ar gyfer buddsoddi'r cyllid cyfalaf sbarduno gan Lywodraeth y DU. Roedd yr adroddiad a gylchredwyd yn nodi'r defnydd arfaethedig o gyfalaf sbarduno i'w ystyried gan y Cyd-bwyllgor, ac roedd y Swyddogion yn ceisio  penderfyniad ar y rhestr o brosiectau i'w cynnwys yn yr Achos Busnes Llawn.

Soniwyd bod y cynigion wedi bod yn destun proses eithaf trylwyr, fodd bynnag, roedd yr amserlen gyflymach wedi effeithio ar lefel y craffu ar gyfer rhai prosiectau penodol.

Hysbyswyd yr aelodau fod yr elfen cyfalaf sbarduno o hyd at £25 miliwn fesul Porthladd Rhydd, yn rhan hirsefydlog o'r pecyn; gyda'r syniad i helpu i sbarduno prif fuddsoddiadau ar gam cynnar er mwyn helpu'r Porthladd Rhydd i gyflawni ei amcanion. 

Amlygwyd bod yr Achos Busnes Llawn yn un cam yn y broses o ddyrannu cyfalaf sbarduno; pe bai'r Achos Busnes Llawn yn cael ei gymeradwyo, yna roedd angen i achosion busnes unigol lenwi manylion pob un o'r cynigion. Dywedodd swyddogion fod porthladdoedd rhydd eraill wedi profi'r angen i ailedrych ar eu dyraniad gan nad oedd yr achosion busnes manwl mewn perthynas â rhai o'r cynigion, yn cyflawni'r hyn y dylent; roedd llawer o resymau am hyn, fel cynlluniau busnes wedi newid, a/neu nid oedd arian cyfatebol preifat wedi cyrraedd.

Cynhaliwyd trafodaeth ynglŷn â'r set o brosesau yr oedd y Porthladd Rhydd wedi'i sefydlu i symud ymlaen gyda dyraniadau; roedd hyn yn cynnwys argymhellion gan banel annibynnol a oedd yn mynd gerbron Bwrdd y Porthladd Rhydd, cyn cael ei gyflwyno i'r Cyd-bwyllgor. Nodwyd bod yn rhaid rhagfyrhau'r broses hon, yn benodol y gwaith o graffu ar gynigion unigol gan y panel annibynnol; fodd bynnag, rhoddwyd argymhellion i Fwrdd y Porthladd Rhydd, a oedd wedyn wedi llunio'r argymhellion a gynhwysir yn yr adroddiad a gylchredwyd i'w ystyried gan y Cyd-bwyllgor.

Cytunodd y Cyd-bwyllgor nad oedd Atodiad 1 a 2 i'r adroddiad a gylchredwyd i'w cyhoeddi, yn unol â Rheoliad 5(2) a (5) o Offeryn Statudol 2001 Rhif 2290 a pharagraff 14 Rhan 4 o Atodlen 12A i Ddeddf Llywodraeth Leol 1972. Yn unol â Pharagraff 21 o'r Atodlen hefyd, ac yn holl

amgylchiadau'r achos, ystyrir bod budd y cyhoedd wrth gynnal yr eithriad yn 

gorbwyso budd y cyhoedd o ran

datgelu'r wybodaeth.

Er mwyn trafod ac ystyried yr Atodiadau preifat, penderfynodd yr Aelodau symud i sesiwn breifat, am y rhesymau uchod. Ar ôl trafod yr Atodiadau preifat hyn, penderfynodd y Cyd-bwyllgor ailddechrau mewn sesiwn gyhoeddus. Cytunwyd ar y penderfyniad isod mewn sesiwn gyhoeddus.

PENDERFYNWYD:

Bod y rhestr o brosiectau a nodir yn Atodiad 2 yr adroddiad a gylchredwyd yn cael ei chymeradwyo i'w chynnwys yn yr Achos Busnes Llawn.