Agenda item

Rhoddwyd diweddariad i'r aelodau o ran cyflwyno'r Gronfa Ffyniant Gyffredin (CFfG).

Amlygodd yr adroddiad a ddosbarthwyd strwythur y rhaglen a sefydlwyd dros y 12 mis diwethaf yn y rhanbarth, a'i chydweddiad strategol yn erbyn y Cynllun Cyflawni Economaidd a natur y cyflawniad. Hysbyswyd yr aelodau fod y rhaglen wedi'i strwythuro o amgylch cyfres o brosiectau angori, yn ogystal â nifer o brosiectau annibynnol sy'n bwydo i mewn i'r ddarpariaeth. Soniwyd bod cyfanswm cyllideb o tua £130 miliwn o arian CFfG craidd wedi'i ddyrannu i'r rhaglen hon.

Rhoddodd y swyddogion drosolwg o'r adroddiad preifat; nid oedd y ffigurau wedi'u cynnwys fel rhan o'r adroddiad a ddosbarthwyd, gan fod cyfnod hawlio ar y gweill ar hyn o bryd. Eglurwyd hyn i'r Pwyllgor, gan gynnwys canlyniadau disgwyliedig y broses.

Tynnwyd sylw at y ffaith y bu ceisiadau am estyniadau gyda rhaglenni blaenorol, a gwrthodwyd y rhain tan yn hwyr yn broses; fodd bynnag, yn y pen draw, cawsant eu cymeradwyo. Soniwyd y gallai hyn ddigwydd mewn perthynas â'r rhaglen waith hon. Dywedodd swyddogion ei bod hefyd yn bwysig nodi bod dyfarniadau grant i fusnesau sy'n cael eu talu unwaith y bydd y grant wedi'i gwblhau, nid yn ystod y broses gyflawni.

Rhoddwyd gwybod i'r Pwyllgor fod y gwariant o fewn y rhaglen yn canolbwyntio ar yr hyn a oedd yn flwyddyn tri ar hyn o bryd, er mai dim ond ers y 12 mis diwethaf yr oedd yn cael ei chyflawni. Nodwyd y byddai angen cynnal trafodaethau dros y deufis nesaf ynghylch a fyddai angen gwario'r arian erbyn mis Rhagfyr, neu a oedd opsiwn i ymestyn hyn am ddau chwarter arall.

Yn dilyn ymlaen o'r uchod, eglurwyd y byddai dau chwarter yn galluogi gwariant llawn. Fodd bynnag, cadarnhaodd swyddogion fod hyblygrwydd o fewn y rhaglen; pe bai angen gwario'r arian erbyn dyddiad cau mis Rhagfyr er mwyn ei chyflawni, a dyddiad cau mis Mawrth ar gyfer cau'r rhaglen, gellid dargyfeirio'r arian i weithgareddau eraill sydd wedi'u cydweddu'n strategol. Ychwanegwyd na ellid symud arian rhwng dyraniadau lleol, gan fod y rhain yn sefydlog fesul Awdurdod Lleol.

Cynhaliwyd trafodaeth ynglŷn â'r adborth yr oedd swyddogion wedi bod yn ei dderbyn gan awdurdodau partner, gan gynnwys y datganiad bod y rhaglen yn gytbwys o ran gwariant cyllid. Nodwyd bod rhai symudiadau'n cael eu gwneud rhwng cymunedau a themâu busnes lle bo angen, ac mae hyblygrwydd lleol yn bodoli i alluogi ar gyfer hynny. Hysbyswyd yr aelodau fod cynlluniau grant newydd yn cael eu llunio mewn rhai achosion, megis grantiau sy'n gysylltiedig ag Eiddo Deallusol (ED) ar gyfer mentrau newydd, i fynd ochr yn ochr â'r ddewislen o opsiynau grant eraill sydd ar gael. Daethpwyd i'r casgliad bod y rhaglen yn cael ei derbyn yn dda hyd yn hyn.

Mynegwyd bod gwariant yn aml yn her gyda'r math hwn o raglen; fodd bynnag, roedd yr holl fecanweithiau ar waith i'w alluogi i gael ei chyflwyno yn effeithiol ac yn amserol. Cadarnhaodd swyddogion y byddant yn gallu rhoi crynodeb llawn i'r aelodau ar gyfer y rhanbarth cyfan o fewn y pythefnos nesaf, a fydd yn arddangos y gwariant a'r allbynnau yr oedd y rhanbarth yn eu cyflawni. Rhoddwyd sicrwydd bod systemau ar waith i gasglu'r wybodaeth hon.

O ran y pryderon amseru, mynegwyd bod Cadeirydd y Cyd-bwyllgor Corfforaethol wedi ysgrifennu at Lywodraeth y DU i geisio hyblygrwydd ar y dyddiadau. Nodwyd bod gohebiaeth bellach wedi bod, y gellir ei dosbarthu i'r Pwyllgor.

Esboniodd swyddogion fod trafodaethau'n cael eu cynnal ynghylch gwaith Y Sefydliad ar gyfer Cydweithrediad a Datblygiad Economaidd dan arweiniad Llywodraeth Cymru. Amlygwyd bod De-orllewin Cymru wedi cael ei ddewis fel maes gwerthuso astudiaeth achos, gan werthuswr Llywodraeth y DU. Rhoddodd swyddogion grynodeb o'r drafodaeth a gafwyd ac awgrymwyd y dylid ystyried y ffordd y gweithredir y rhaglen a'r hyn a gyflawnwyd pan ymddiriedwyd  ynddynt i roi trefn ar y swm o arian.

PENDERFYNWYD:  Bod yr adroddiad yn cael ei nodi.