Agenda item

Rhoddwyd cyflwyniad i'r aelodau a oedd yn gosod y cefndir o ran ffactorau a strwythurau llywodraethu sy'n dylanwadu ar bolisi ynni rhanbarthol, gan amlinellu datblygiadau hysbys ym maes ynni rhanbarthol.

Cynhaliwyd trafodaeth ynghylch cynllunio ar gyfer system ynni carbon isel, fwy integredig. Eglurwyd bod y Polisi Cenedlaethol, Strategaethau Ynni Rhanbarthol a Chynlluniau Ynni Ardal Leol (CYAL) yn rhan annatod o gyflawni hyn. 

Tynnodd y cyflwyniad a ddosbarthwyd sylw at y tirlun o fewn Rhanbarth De-orllewin Cymru, gan roi darlun eang o'r llywodraethu a lefel y manylder ar y ffrydiau gwaith amrywiol; er enghraifft, roedd nifer o Grwpiau Tasg Swyddogion Rhanbarthol yn cael eu cynnal, ac roedd cynnydd yn digwydd o ran prosiectau allweddol y Rhanbarth, gan gynnwys y Prosiect Porthladd Rhydd Celtaidd a phrosiect Eden Las – Morlyn Llanw.

Rhoddwyd gwybod i aelodau fod y sefyllfa bresennol yn weddol debyg ar draws rhanbarthau eraill yng Nghymru, o ran eu strwythurau llywodraethu.

Mynegwyd bod Cyd-bwyllgor Corfforaethol De-orllewin Cymru wedi cymeradwyo ei Gynllun Corfforaethol, a oedd yn cynnwys y cynllun gweithredu ar gyfer y Strategaeth Ynni Ranbarthol; roedd dwy flaenoriaeth wedi'u cynnwys yn y cynllun hwn, ac roedd y Grŵp Cyfarwyddwyr Rhanbarthol wedi bod yn gweithio ar wneud cynnydd. Y flaenoriaeth gyntaf a nodwyd oedd mapio adnoddau a oedd ar gael a nodi bylchau mewn adnoddau; un o'r mesurau effaith hyn oedd sefydlu Tîm Cyflwyno Rhanbarthol. Cadarnhawyd bod hysbysebion swyddi ar gyfer y tair swydd o fewn y Tîm wedi cael eu hysbysebu, a byddai cyfweliadau'n cael eu cynnal yn ystod yr wythnosau nesaf; roedd y tair swydd ar gyfer Rheolwr Prosiect a dau Swyddog Prosiect, a byddai pob un ohonynt yn cael eu hariannu gan Lywodraeth Cymru. Eglurwyd y byddai'r broses o roi ar waith a chyflwyno'n cyflymu o'r pwynt hwn ymlaen. 

Yn dilyn yr uchod, nodwyd mai'r ail flaenoriaeth oedd llunio rhaglenni rhoi ar waith ochr yn ochr â phartneriaid; rhai o'r camau gweithredu o fewn y flaenoriaeth hon oedd datblygu cynlluniau gweithredu sydd wedi'u blaenoriaethu, ac sy'n cyd-fynd â'r CYAL. Cadarnhawyd bod y gwaith hwn wedi bod yn mynd rhagddo, ac unwaith eto bydd y gwaith hwn yn datblygu ymhellach pan fydd y Tîm Cyflwyno Rhanbarthol ar waith.

Rhoddwyd gwybod i'r Pwyllgor am yr heriau sy'n gysylltiedig â'r ffrwd waith hon:

-         Cyflymder a graddfa ar y lefel strategol ranbarthol

-         Ansicrwydd ynghylch cost cyflwyno/sero net

-         Cyllid a refeniw cyfalaf ar gyfer prosiectau a nodwyd

-         Gweithio gyda sgiliau i ddylunio, cyflwyno, gweithredu, cynnal a monitro

-         Diwygiadau polisi a dylanwadau

-         Llywodraethu

-         Isadeiledd 

 

Ailadroddwyd mai un o'r camau blaenoriaeth oedd alinio prosiectau; un o'r prosiectau a nodwyd oedd prosbectws buddsoddi ar gyfer y Rhanbarth, a fyddai'n alinio'r Porthladd Rhydd Celtaidd, CYAL, cynllunio rhanbarthol a phrosiectau allweddol eraill sydd ar waith ar draws y Rhanbarth. Rhoddwyd gwybod i'r aelodau fod Swyddogion yn gobeithio datblygu prosbectws buddsoddi mewn partneriaeth â Diwydiant Sero Net Cymru.

Roedd y Prif Weithredwr o Ddiwydiant Sero Net Cymru yn bresennol yn ystod cyfarfod yr Is-bwyllgor Ynni i roi rhagor o wybodaeth am y cynnig yn y dyfodol ar gyfer prosbectws buddsoddi ar gyfer y Rhanbarth. Esboniwyd bod Diwydiant Sero Net Cymru wedi cael ei sefydlu gyda chefnogaeth gan Lywodraeth Cymru, er mwyn cynorthwyo clystyrau diwydiannol Cymru yn eu hymdrechion i ddatgarboneiddio; Dros y chwe mis diwethaf bu ffocws ar gefnogi'r clystyrau diwydiannol yn ne Cymru i gyflwyno eu cynlluniau. Yn dilyn trafodaethau gyda Chyngor Sir Penfro, nodwyd ei bod yn amlwg bod angen diweddaru'r prosbectws buddsoddi ar gyfer yr ardal er mwyn helpu i ddenu mewnfuddsoddiad, ac i dynnu sylw at fanteision y cynlluniau buddsoddi a ddatblygwyd a sut y gallent fod o fudd i'r Rhanbarth, gan gynnwys y Porthladd Rhydd Celtaidd.

Rhoddwyd gwybod i'r Pwyllgor fod sawl Canolfan Twf Glân o fewn clwstwr diwydiannol de Cymru; Clwstwr Ynni’r Dyfodol y Ddau Gleddau oedd un ohonynt, fodd bynnag roeddent hefyd mewn ardaloedd eraill megis Port Talbot, Caerdydd a Chasnewydd. Nodwyd y byddai'n bwysig i bob Canolfan fanteisio ar y potensial ar gyfer  mewnfuddsoddi a manylu ar sut y bydd y clwstwr hwnnw'n datblygu dros amser.

Cyfeiriwyd at y gefnogaeth yr oedd Diwydiant Sero Net Cymru yn ei gael gan PwC, a sut y byddent yn ystyried recriwtio staff i gynorthwyo gyda'r gwaith y mae angen ei wneud i symud y gwaith hwn ymlaen.

Daethpwyd i'r casgliad mai bwriad Diwydiant Sero Net Cymru oedd sefydlu ymagwedd tîm, ac alinio elfennau amrywiol y gwaith, yn hytrach nag ailddyfeisio'r hyn a oedd eisoes mewn bodolaeth.

Gofynnodd yr aelodau a oedd Diwydiant Sero Net Cymru yn bwriadu alinio'r gwaith â phrosiectau a ariennir yn breifat, fel Prosiect Eden Las – Morlyn Llanw, nad oedd yn cael eu hariannu gan y Llywodraeth. Rhoddwyd sicrwydd i'r Pwyllgor mai dyma oedd y bwriad, gyda chefnogaeth y cwmnïau preifat. 

Cyn parhau gyda'r cyflwyniad, eglurwyd bod y Tîm Cludiant o fewn Gwasanaeth Ynni Llywodraeth Cymru wedi cwblhau rhywfaint o ddadansoddiad ar y broses o drawsnewid y cerbydlu ar draws yr holl Awdurdodau Lleol. Roedd swyddogion yn falch o gadarnhau bod Rhanbarth y de-orllewin yn arwain y ffordd ar draws Cymru; y cyfartaledd ar gyfer trawsnewid y cerbydlu oedd tua 4%, ac roedd y de-orllewin yn arwain gyda 7.2%.

Darparodd swyddogion wybodaeth am yr economi ranbarthol a'r dirwedd ynni; pwysigrwydd deall y dirwedd, maint y cyfle a'r bylchau. Esboniwyd yn y cyflwyniad mai Y Ddau Gleddau oedd Porthladd Ynni mwyaf y DU; fodd bynnag, o amgylch y porthladd hwn oedd Purfa a Therfynfa Olew Penfro Valero sef yr ail fwyaf yn Ewrop, Gorsaf Bŵer Penfro RWE, sef yr ail orsaf bŵer nwy cylch cyfun fwyaf yn Ewrop, Terfynfeydd LNG yn South Hook a Dragon a Puma gyda'u cyfleuster storio nwyddau. O ran datblygiadau alltraeth, tynnwyd sylw at y ffaith bod potensial enfawr yn y Môr Celtaidd ar gyfer ynni adnewyddadwy morol, p'un a yw hyn yn osodiadau pŵer gwynt neu bŵer tonnau llanw sy'n arnofio ar y môr.

Roedd yn amlwg bod gan ranbarth y de-orllewin allyrwyr helaeth, gydag allyrrydd pwynt unigol mwyaf y DU yng Ngwaith Dur TATA ym Mhort Talbot, RWE yw'r trydydd allyrrydd mwyaf yn y DU, ac mae Valero ymysg deg allyrrwr pwynt sengl gorau'r DU; Roedd yn gyfle sylweddol i gefnogi'r broses hon o drosglwyddo i ddulliau carbon isel o gynhyrchu a defnyddio ynni.

Cynhaliwyd trafodaeth ynghylch prosiect Clwstwr Diwydiannol De Cymru a'i weledigaeth i 'ddatblygu clwstwr diwydiannol gwirioneddol gynaliadwy o'r radd flaenaf, sy'n addas ar gyfer anghenion cymdeithasol 2030, 2040, 2050 a thu hwnt i hynny'. Eglurwyd y gall datgarboneiddio ddigwydd mewn amrywiaeth o ffyrdd megis newid tanwydd o nwy ac olew i drydan adnewyddadwy, ffwrneisi arc trydan yn y diwydiant dur, ac electrolysu i wneud hydrogen gwyrdd gan ddefnyddio trydan adnewyddadwy; roedd rhai manteision mawr i hyn gan gynnwys cadw swyddi, a datgloi cyfleoedd pellach yn yr economi adnewyddadwy newydd.

Rhoddwyd gwybod i'r aelodau am un o'r datblygiadau o'r enw HyLine Cymru; byddai hon yn biblinell hydrogen bwrpasol a fyddai'n llifo o'r gorllewin, lle'r oedd y ffermydd gwynt arnofiol ar y môr yn mynd i gael eu sefydlu. Eglurwyd y dylid cael digonedd o drydan adnewyddadwy drwy hyn; Roedd adegau pan na fyddai'r trydan adnewyddadwy yn bwydo i mewn i'r grid trydan, ac yn ystod y cyfnod hwn byddai'n well gwneud hydrogen gyda'r trydan adnewyddadwy hwnnw. Dywedodd swyddogion fod hydrogen yn danwydd amlbwrpas y gellir ei ddefnyddio ble a phryd yr oedd ei angen; roedd piblinell i'r clwstwr diwydiannol hwnnw yn allweddol er mwyn galluogi'r diwydiant hydrogen, a hefyd galluogi ffermydd gwynt arnofiol ar y Môr Celtaidd. Ychwanegwyd y gallai'r pŵer a gynhyrchir o'r tyrbinau gael ei ddefnyddio yn ystod y dydd a'r nos.

Cafwyd trafodaeth bellach ynghylch ffermydd gwynt arnofiol ar y môr. Dywedwyd mai uchelgais The Crown Estate (TCE) oedd datgloi hyd at 4.5GW o gapasiti ffermydd gwynt arnofiol ar y môr erbyn 2035, gyda photensial rhanbarthol i ddefnyddio 20GW pellach o gapasiti ffermydd gwynt arnofiol ar y môr erbyn 2045. Soniodd swyddogion fod astudiaethau wedi dangos bod hyd yn oed mwy o gapasiti ar gael, o bosib rhwng 49.9GW a 120GW. Roedd y cyflwyniad yn nodi bod 3,000 o swyddi a £682 miliwn mewn cyfleodd cadwyn gyflenwi ar gyfer Cymru a Chernyw erbyn 2030 a chyfeiriwyd at y tri phrosiect a oedd ar waith ar hyn o bryd:

-         Datblygwyd TwinHub gan Hexicon a disgwylir iddo gael ei gwblhau dan gontract erbyn 2025.

-         Datblygwyd Erebus gan Blue Gem Wind a disgwylir ei gwblhau erbyn 2026/2027.

-         Datblygwyd Valorous gan Blue Gem Wind a disgwylir ei gwblhau erbyn 2029.

Darparodd swyddogion graffig o ble roedd y parthau caniatáu cychwynnol yn mynd i fod gyda'r TCE ar gyfer ffermydd gwynt arnofiol ar y môr; tynnwyd sylw at y tri pharth, roedd gan bob un 1.5GW er mwyn gwneud cyfanswm o 4.5GW ar gyfer capasiti erbyn 2035. Eglurwyd, yn dilyn hynny, byddai'n allweddol cael y pŵer hwnnw i'r lan mewn modd cydlynol; Ac fel y soniwyd yn flaenorol, gallai hydrogen gael ei wneud allan ar y môr a chyrraedd y traeth mewn piblinellau.

Cyfeiriodd yr aelodau at y ffaith bod TCE yn fusnes Llywodraeth y DU, a gofynnwyd am eglurder o ran sut y byddai arian ar gyfer trwyddedau'n llifo'n ôl i Gymru. Nodwyd y byddai'r arian hwnnw'n mynd at Lywodraeth y DU ar hyn o bryd; fodd bynnag, roedd argymhelliad gan y Comisiwn Seilwaith Cenedlaethol i nodi a ellid ei ddatganoli, yn yr un modd â sut y cafodd Ystâd y Goron yr Alban ei ddatganoli. Ychwanegwyd mai'r manteision i Gymru oedd caniatâd i adeiladu dyfeisiau ynni adnewyddadwy yn nyfroedd Cymru, a fyddai hefyd yn creu manteision ar gyfer y gadwyn gyflenwi. 

Cyfeiriwyd at y newyddion diweddar am y newid i drydan yng Ngwaith Dur Tata ym Mhort Talbot, a'r goblygiadau i'r swyddi cynhyrchu dur hynny. Nodwyd y byddai ffwrneisi arc trydan yn gofyn am lai o waith corfforol, fodd bynnag, roedd £1.2 biliwn wedi'i neilltuo ar gyfer Port Talbot, sef un o'r buddsoddiadau mwyaf a welwyd ar gyfer y diwydiant ers degawdau. Ychwanegwyd bod y ffwrneisi arc trydan yn gam tuag at ddiwydiant dur gwyrdd, ac y byddai mwy o gyfleoedd o ganlyniad i hyn. Soniodd swyddogion fod y £1.2 biliwn yn ychwanegol at fuddsoddiadau niferus eraill gwerth biliynau y mae eu hangen i ddatgarboneiddio'r diwydiant yn ne Cymru, ac i gadw rhywfaint o'r gweithgarwch diwydiannol hwnnw; yn y tymor byr i'r tymor canolig, roedd twf posibl mewn swyddi er mwyn cyflawni'r cynllun uchelgeisiol hwn ar draws y rhanbarth.

Cynhaliwyd trafodaeth ynghylch y cyfleoedd sy'n gysylltiedig â'r ffrydiau llanw, amrediad llanw a thonnau; a'r prosiectau amrywiol a oedd yn mynd rhagddynt ar hyn o bryd. Soniwyd mai un o fanteision ffrwd llanw ac amrediad llanw oedd eu bod yn ffynonellau pŵer rhagweladwy.

Roedd y cyflwyniad yn manylu ar wybodaeth am Brosiect Datblygu Porthladd Abertawe (a elwid gynt yn Brosiect Eden Las – Morlyn Llanw); Roedd hwn yn brosiect gwerth £4 biliwn, amcangyfrifir ei fod yn werth £114m y flwyddyn i economi Abertawe, a'i fod yn creu hyd at 2,500 o swyddi llawn amser. Ymhelaethodd swyddogion ar y gwahanol elfennau o'r prosiect, a oedd yn cynnwys y canlynol:

-         Ehangu safle maes parcio Fabian Way i greu hwb trafnidiaeth ynni gwyrdd a allai gynnwys gorsaf gweithgynhyrchu hydrogen ar gyfer trafnidiaeth sy'n cael ei bweru gan hydrogen, digonedd o fannau gwefru cerbydau trydan, a bwytai a mannau gweithio hyblyg i ymwelwyr eu mwynhau.

-         Ehangu ar gynlluniau fferm solar sydd eisoes wedi'u cymeradwyo ar hen safle tirlenwi Tir John i greu un o gyfleusterau cynhyrchu ynni solar mwyaf y DU.

-         Cyfleuster gweithgynhyrchu newydd ar hen safle Morrissey yn SA1 i greu batris uwch-dechnoleg a fyddai'n storio'r ynni adnewyddadwy sy'n cael ei greu gan y prosiect ac ar gyfer dosbarthiad byd-eang.

-         Morlyn llanw

-         Cyfleuster solar arnofiol

-         Canolfan ddata ar raddfa fawr sydd wedi'i phweru gan ynni adnewyddadwy

-         Canolfan ymchwil y dyfroedd a newid yn yr hinsawdd

-         Eco-gartrefi ynni effeithlon wedi'u hangori yn y dŵr

-         System wresogi ardal newydd sy'n defnyddio ynni adnewyddadwy

 

O ran trosglwyddo trydan adnewyddadwy, esboniwyd nad oes gan y grid y gallu ar hyn o bryd i allu trosglwyddo mwy na 1.8GW; y llynedd, cynhyrchodd y DU tua 30% o'i ynni o ddyfeisiau ynni adnewyddadwy, a phŵer gwynt oedd y cyfrannwr mwyaf. Eglurwyd ymhellach, pan oedd y ffermydd gwynt yn gweithredu gyda'r nos, ac roedd y galw ar y grid yn isel, efallai y bydd cyfleoedd i storio'r pŵer hwn mewn batris neu i electrolysu hydrogen gwyrdd y gellid ei storio i'w ddefnyddio yn y dyfodol ar gyfer diwydiant, cynhyrchu pŵer, trafnidiaeth neu wres. Esboniwyd pan oedd tyrbinau gwynt yn cynhyrchu i gapasiti ar hyn o bryd, ac yn cynhyrchu mwy o bŵer gwynt nag y gellir ei drosglwyddo oherwydd tagfeydd grid, gall hyn arwain at orlwytho'r grid, ar yr adeg honno mae'r Grid Cenedlaethol yn talu'r ffermydd gwynt i'w diffodd, ac yn talu i droi generadur arall ymlaen, a fyddai fel arfer yn cael ei bweru gan nwy yn agos at y galw. Dywedodd swyddogion fod y DU wedi gwario £215 miliwn y llynedd ar ddiffodd ffermydd gwynt, a £717 miliwn ar droi gweithfeydd pŵer nwy ymlaen i gymryd lle'r pŵer gwynt coll. 

Yn dilyn yr uchod, tynnodd Swyddogion sylw at rai o'r atebion posibl, un o'r rheini oedd adeiladu rhagor o geblau trydan i gymryd y pŵer i ganolfannau'r galw; byddai hyn yn golygu y byddai mwy o beilonau, ac nad yw'r rhain yn cael eu ffafrio o fewn cymunedau. Ateb arall a grybwyllwyd oedd ychwanegu rhagor o gyfarpar storio ynni ger tagfeydd cebl; Er enghraifft, batris lithiwm, hydro pwmpiedig a chreu hydrogen glas/gwyrdd.

Darparodd swyddogion ragor o wybodaeth am gynhyrchu hydrogen, a oedd â photensial gwych ar gyfer trydan adnewyddadwy. Eglurwyd bod angen gwneud gwaith uwchraddio o ran y grid trydan a'r isadeiledd porthladdoedd; fodd bynnag, roedd digon o gynnydd yn cael ei wneud, gyda chynnwys carbon y trydan grid yn gostwng 60-70% dros y deng mlynedd diwethaf, gwnaeth llawer o waith datblygu gyda'r porthladdoedd yn enwedig ers cyhoeddiad y Porthladd Rhydd Celtaidd. Rhoddwyd gwybod i'r Aelodau mai prosesau diwydiannol, gwres ac allyriadau trafnidiaeth oedd y sectorau anoddaf o ran eu rhoi ar waith a lleihau allyriadau; Roedd llawer o olew a nwy yn parhau i gael eu defnyddio mewn diwydiant, yn ogystal â diesel a phetrol yn cael eu defnyddio ar gyfer cerbydau. Fodd bynnag, nodwyd bod potensial i hydrogen gwyrdd wasanaethu diwydiant, trafnidiaeth, cynhyrchu pŵer a gwres; Dangosodd astudiaethau y byddai cynyddu nifer y ffermydd gwynt arnofiol ar y môr yn ffordd addas ac economaidd o gynhyrchu hydrogen gwyrdd, ac yn galluogi cynnydd mewn ynni defnyddiadwy er mwyn darparu gwres a thanwydd ar gyfer trafnidiaeth. Soniwyd y byddai'r rhagolygon ar gyfer cost cynhyrchu hydrogen gwyrdd o ffermydd gwynt arnofiol ar y môr y DU yn dod yn fforddiadwy iawn, ac erbyn 2050 bydd yn gyfartal yn y DU gyda'r pris byd-eang isaf ar gyfer cynhyrchu hydrogen gwyrdd.

Rhoddwyd gwybodaeth i'r Pwyllgor am y prosiectau presennol a oedd ar waith ar draws y Rhanbarth:

-         Canolfan Sero Net Penfro RWE – cyhoeddwyd £3biliwn ar gyfer y prosiect hwn, a oedd yn edrych ar bob agwedd ar gynhyrchu hydrogen gwyrdd a sut y gellid defnyddio'r hydrogen hwn.

-         Roedd Rhaglen Bargen Ddinesig Bae Abertawe yn cynnwys nifer o brosiectau a oedd yn cyd-fynd â'r agenda ynni rhanbarthol; roedd rhai o'r rhain yn cynnwys prosiect Morol Doc Penfro, Cartrefi fel Gorsafoedd Pŵer a Phrosiect Cefnogi Arloesedd a Thwf Carbon Isel.

-         Canolfan Ragoriaeth Fyd-Eang ar gyfer Rheilffyrdd – rheilffordd sero net pwrpasol cyntaf y DU a adeiladwyd ar gyfer ymchwil, profi ac ardystio cerbydau rheilffyrdd, isadeiledd a thechnolegau rheilffyrdd newydd arloesol, gyda'r nod o fod yn hollol weithredol erbyn 2025.

-         Cais Porthladd Rhydd Celtaidd - roedd yr achos busnes yn cael ei ddrafftio ar gyfer y prosiect hwn ar hyn o bryd, gyda'r gofyniad i'w gyflwyno i Lywodraeth y DU erbyn diwedd y mis; bydd y prosiect hwn yn trawsnewid y porthladdoedd ac roedd ganddo lawer o fanteision megis 16,000 o swyddi posib, buddsoddiad newydd gwerth £5.5 biliwn a chyflymu'r broses o gyflwyno ffermydd gwynt arnofiol ar y môr.

-         Fferm Solar Eirlys - cynnig ar gyfer datblygiad solar 29MW ym Mhort Talbot.

-         Canolfan Eto – canolfan economi gylchol yn Sir Gaerfyrddin sy'n edrych ar adnoddau ailgylchu yn eu 'pentref ailddefnyddio'.

 

Holodd yr aelodau sut y byddai hydrogen yn cael ei drosglwyddo ar draws y wlad. Cadarnhaodd swyddogion fod prosiect ar waith gyda'r cwmnïau rhwydwaith nwy o'r enw 'Project Union'. Byddai hyn yn cynnwys piblinell nwy hydrogen, a fyddai'n cysylltu'r holl glystyrau diwydiannol ar draws y sir. Soniwyd y byddai HyLine Cymru yn gysylltiedig â hyn, gan redeg o'r ddyfrffordd yn Aberdaugleddau i'r clwstwr diwydiannol ym Maglan, Port Talbot. Ychwanegodd swyddogion y gallai hyn gael ei symud o bosib yn ôl yr angen ar draws y wlad, er mwyn diwallu'r anghenion am ddiwydiant, gwres a thrafnidiaeth.

Mynegwyd bod cydweithio yn hynod bwysig, a bod angen ac awydd i wneud hyn; Roedd rhywfaint o waith cydweithredol da yn mynd rhagddo ar hyn o bryd, ond cydnabuwyd y gellid ehangu ar hyn. Un enghraifft a ddarparwyd o ble roedd angen cydweithio oedd yr isadeiledd gwefru ac ail-lenwi. Dywedodd swyddogion ei bod hefyd yn allweddol bod y Cyd-bwyllgor Corfforaethol yn ymgysylltu, yn rhanbarthol, o ran trawsnewid y cerbydlu.

Yn ogystal â'r uchod, eglurwyd cynhaliwyd ymarfer caffael cydweithredol yn ddiweddar ar gyfer cerbydluoedd ar draws Cymru gyfan; Roedd hyn wedi arwain at arbediad o tua £650,000, a gwelwyd amseroedd cyflwyno'n gostwng tua 18 mis i fod rhwng dau a thri mis. Soniwyd y bydd ymarfer caffael arall yn cael ei gynnal yn y dyfodol agos, a chadarnhaodd swyddogion y byddent yn rhannu rhagor o wybodaeth ynghylch hyn pan fydd ar gael.

Cynhaliwyd trafodaeth ynghylch yr angen i'r Is-bwyllgor Ynni a'r Cyd-bwyllgor Corfforaethol benderfynu sut yr oedd yn mynd i fwrw ymlaen â'r gwaith hwn. Soniwyd efallai y bydd angen casglu rhagor o wybodaeth cyn i'r Pwyllgorau allu gwneud penderfyniad ar hyn.

PENDERFYNWYD: Nodi'r adroddiad.