Agenda item

Dewis eitemau priodol o agenda’r Cabinet ar gyfer craffu cyn penderfynu (amgaeir adroddiadau ar gyfer yr Aelodau Craffu)

 

Adroddiad Diogelu Blynyddol Gorllewin Morgannwg

 

Rhoddodd swyddogion amlinelliad byr o'r adroddiad. Bwrdd rhanbarthol yw Bwrdd Diogelu Gorllewin Morgannwg. Mae'n dod â sefydliadau at ei gilydd i edrych ar ddiogelu ac mae hefyd yn dwyn sefydliadau i gyfrif. Maent yn cynnal adolygiadau arferion i blant ac oedolion. Mae'r adroddiad yn amlinellu rhan gyntaf y cynllun diogelu. Prif amcan y Bwrdd yw diogelu plant ac oedolion, a'r ail amcan yw atal niwed mewn perthynas â phlant ac oedolion.

 

Mae'r adroddiad yn nodi strwythur y grŵp a bydd pob sefydliad sy'n gysylltiedig yn ymgymryd ag elfennau o'r gwaith. Mae'r bwrdd yn sicrhau ymagwedd ac ymateb cyson ar draws y rhanbarth.

 

Nododd yr aelodau fod yr adroddiad yn amlinellu nifer uchel o orddosau ac hunanladdiadau honedig ymhlith dynion. Holodd yr aelodau os gellid nodi'r rheswm dros hyn. Dywedodd swyddogion ei fod yn adlewyrchu'r tueddiadau a nodwyd yn ystod argyfwng ariannol 2008. Mae pob hunanladdiad ac ymgais sylweddol at hunanladdiadau yn cael eu hatgyfeirio at y gwasanaeth. Mae data'n cael ei gasglu, gan weithio gydag Iechyd Cyhoeddus Cymru, i nodi'r gwasanaethau y mae'r unigolion a'u teuluoedd yn cael mynediad atynt i weld a oes modd gwneud unrhyw beth yn wahanol i atal yr hunanladdiadau hynny.

 

Yn dilyn gwaith craffu, nododd yr aelodau'r adroddiad er gwybodaeth.

 

 

Adroddiad Blynyddol Grant Cymorth Tai 2022

 

Rhoddodd swyddogion drosolwg byr o'r adroddiad a ddosbarthwyd. Y grant yw'r brif ffynhonnell cyllid ar gyfer gwasanaethau digartrefedd, gan gynnwys Tîm Opsiynau Tai a Gwasanaeth Annibyniaeth Cymunedol y cyngor. Mae hefyd yn ariannu ystod lawn o wasanaethau wedi'u comisiynu, er enghraifft llochesi trais domestig. Nododd swyddogion fod swm y cyllid a ddyfarnwyd wedi bod yr un fath ar gyfer blynyddoedd ariannol 21-22, 22-23 a 23-24. Gofynnwyd i'r aelodau nodi'r pwysau ar y gwasanaethau gyda mwy o alw a chostau dros y blynyddoedd hynny.

 

Mae'r grant yn allweddol wrth gyflawni'r Cynllun Ailgartrefu Cyflym ac wrth atal digartrefedd trwy gynnig amrywiaeth o gefnogaeth wedi'i thargedu i bobl yn eu cartrefi a hefyd gwasanaethau cefnogi mewn adeiladau. Dywedodd swyddogion y bydd darn allweddol o waith yn cael ei wneud dros y flwyddyn neu ddwy nesaf er mwyn optimeiddio'r grant er mwyn sicrhau ei fod yn cefnogi'r Cynllun Ailgartrefu Cyflym.

 

Nododd aelodau'r adroddiad.

 

 

Dangosyddion Perfformiad Chwarter 3

 

Awgrymodd swyddogion efallai bod y pwyllgor craffu am ganolbwyntio ar ddangosyddion y maen nhw'n eu hystyried yn rhai allweddol. Gallai swyddogion wneud darn o waith i ganolbwyntio'r dangosyddion ar yr hyn y mae ei angen ar y pwyllgor craffu.

 

Holodd aelod, o ran yr oedi cyfartalog i ddarparu grantiau i bobl anabl, beth yw cyfartaledd yr amser aros ar gyfer defnyddiwr y gwasanaeth? Fe gadarnhaodd swyddogion bod yna rywfaint o oedi sylweddol wedi bod yn ystod y pandemig oherwydd y galw yn y farchnad breifat gyda gwaith adeiladu. Ar y cyfan mae gwaith cawod wedi'i wneud yn eithaf cyflym, ond roedd y gwaith codi estyniad yn cymryd rhwng 6-9 mis. Fodd bynnag, mae'n dechrau gwella wrth i'r farchnad breifat arafu.

 

Holodd aelodau ynghylch cwyn a gynhaliwyd yn rhannol yn erbyn gweithiwr cymdeithasol a amlinellir yn yr adroddiad a'r gwersi a ddysgwyd o hyn. Holodd yr aelodau os cafodd y gwersi a ddysgwyd eu hanfon ymlaen at gyflogwr newydd y gweithiwr cymdeithasol er mwyn sicrhau na fydd yr un camgymeriadau'n cael eu hailadrodd. Dywedodd swyddogion y byddant yn derbyn cyngor gan AD fel y bo'n briodol. Yn gyffredinol byddai gwallau ar draws system yn cael eu hystyried a'r gwersi ehangach a ddysgwyd o'r gŵyn a sut y gellir gwella ar hyn.

 

Nododd yr aelodau bod nifer y plant sy'n derbyn gofal a'r rhai ar y gofrestr amddiffyn plant wedi lleihau dros y 10 mlynedd diwethaf. Fodd bynnag, ers chwarter cyntaf 2021, mae'r niferoedd yn lleihau yn eithaf sylweddol. Holodd aelod os oedd rheswm penodol am y dirywiad cyflym hwn. O ran plant sy'n derbyn gofal, dywedodd aelodau gweithiwyd â phlant a theuluoedd er mwyn caniatáu i blant ddychwelyd adref yn ddiogel. Yn ystod y pandemig, arafodd y broses hon ac arhosodd pobl ifanc mewn gofal maeth am gyfnodau hirach. Fodd bynnag, bydd y niferoedd hyn nawr yn parhau i leihau. Dywedodd swyddogion nad oes rhifau targed ar gyfer plant sy'n derbyn gofal a phlant ar y gofrestr amddiffyn plant. Nodwyd hefyd, o bryd i'w gilydd, fod grwpiau mawr o frodyr a chwiorydd yn dod oddi ar y gofrestr amddiffyn plant sydd weithiau'n gallu esbonio'r dirywiad cyflym mewn ffigyrau.

 

Nodwyd ei bod yn ymddangos bod targedau'n goch weithiau, fodd bynnag, nid yw hyn bob amser yn adlewyrchu'r sefyllfa'n gywir. Ar hyn o bryd mae system gorfforaethol ganolog sy'n gofyn bod targedau ac amcanion yn cael eu gosod. Fodd bynnag weithiau mae hyn yn wrthgynhyrchiol gan fod angen esboniad llawer mwy cymhleth ar y ffigyrau ynghylch y canlyniad.

 

Holodd aelodau ynghylch y cynnydd yn nifer y derbyniadau i gartrefi gofal a'r pryderon ynghylch argaeledd gwelyau. Er bod gwelyau gwag, nododd y swyddogion nad oes staff ar gael yn y cartrefi gofal i ofalu am y gwelyau hynny. Yn amlach na pheidio mae pobl yn cael eu derbyn i gartref gofal ar ôl cael eu rhyddhau o'r ysbyty wrth ddisgwyl am ofal yn y gymuned neu pan nad oes gofal ar gael yn y gymuned i ofalu am bobl, felly maent yn cael eu derbyn yn y cartref gofal.

 

Yn dilyn gwaith craffu, nododd yr Aelodau yr adroddiad.

 

 

Y Gronfa Gweithredu ar Gamddefnyddio Sylweddau: Cytundebau Grant

 

Rhoddodd y swyddogion drosolwg o'r adroddiad a ddosbarthwyd gyda'r agenda. Bydd y cynnydd mewn cyllid yn cefnogi'r amcanion i atal marwolaethau sy'n gysylltiedig â chyffuriau, lleihau niwed sy'n gysylltiedig â chyffuriau a sicrhau bod y rheini y mae angen cefnogaeth arnynt yn gallu cael mynediad amserol at y gwasanaethau y mae eu hangen arnynt pan fydd eu hangen arnynt.

 

Er cydnabuwyd bod nifer y marwolaethau sy'n ymwneud â chyffuriau ar draws y rhanbarth yn cynyddu, roedd nifer y marwolaethau yng Nghastell-nedd Port Talbot wedi lleihau yn ystod y flwyddyn ddiwethaf.

 

Yn dilyn craffu roedd yr aelodau’n gefnogol o'r argymhelliad i'w ystyried gan Fwrdd y Cabinet.

 

 

Cymryd rhan yng Nghynllun Cartrefi Gwag Llywodraeth Cymru

 

Rhoddodd y swyddogion drosolwg o'r adroddiad a ddosbarthwyd gyda'r agenda.

 

Holodd aelodau ynghylch y rhesymau dros lofnodi cytundeb gwasanaeth gyda RhCT a'r buddion a ddaw yn sgil hyn. Cadarnhaodd swyddogion fod y cynllun a amlinellwyd yn copïo cynllun Tasglu'r Cymoedd a weinyddwyd gan Gyngor Rhondda Cynon Taf. Rhondda Cynon Taf yw'r awdurdod arweiniol a benodwyd gan Lywodraeth Cymru ar gyfer y cynllun wrth symud ymlaen. Bydd RhCT yn ymdrin ag ochr gyfreithiol ac ariannol y cynllun. Bydd yr awdurdodau lleol yn ymdrin â'r arolygon.

 

Yn dilyn craffu roedd yr aelodau’n gefnogol o'r argymhelliad i'w ystyried gan Fwrdd y Cabinet.