Agenda item

Darparwyd Adroddiad Blynyddol Drafft Panel Annibynnol Cymru ar Gydnabyddiaeth Ariannol (PACGA) i'r Pwyllgor; mae'r Adroddiad Blynyddol yn nodi cynigion a fyddai, o'u gweithredu, yn effeithio ar gydnabyddiaeth ariannol Aelodau yn y flwyddyn ddinesig 2022/2023. Soniwyd bod y PACGA yn gwahodd sylwadau ar ei gynigion drafft cyn gwneud ei benderfyniadau terfynol ar gyfer y flwyddyn ddinesig ganlynol.

Nodwyd y byddai Pennaeth y Gwasanaethau Democrataidd yn ymateb i'r cynigion ar ran y cyngor, a fyddai'n cynnwys unrhyw sylwadau a/neu farn a fynegwyd gan Aelodau Pwyllgor y Gwasanaethau Democrataidd.

Hysbyswyd yr Aelodau fod y ffigurau yn yr adroddiad a ddosbarthwyd wedi'u pennu gan PACGA a mater i'r Aelod unigol fyddai derbyn y trefniadau diwygiedig ai peidio; roedd gan bob Aelod Etholedig gyfle i roi eu hymatebion unigol i'r cynigion drwy eu cyflwyno i PACGA yn uniongyrchol.

Gofynnwyd a fyddai Aelodau Pwyllgor y Gwasanaethau Democrataidd yn cael gweld ymateb drafft y cyngor cyn iddo gael ei anfon at PACGA. Tynnodd swyddogion sylw at y ffaith y byddai Pennaeth y Gwasanaethau Democrataidd yn cynnwys barn a sylwadau Aelodau Pwyllgor y Gwasanaethau Democrataidd drwy ystyried cofnodion y cyfarfod; pe na bai unrhyw sylwadau'n cael eu codi, yna byddai swyddogion yn darparu ymateb niwtral. Hysbyswyd yr Aelodau fod angen cyflwyno'r ymateb erbyn diwedd mis Tachwedd 2021; cyn hyn cytunwyd y bydd yr ymateb yn cael ei ddrafftio a'i anfon at yr Aelodau drwy e-bost i'w ystyried, cyn ei anfon at y PACGA.

Yn ogystal, amlygwyd y byddai'r Cadeirydd a Phennaeth y Gwasanaethau Democrataidd yn mynd i sesiwn friffio PACGA ddydd Gwener 22 Hydref; a byddent yn hapus i godi unrhyw bwyntiau a oedd gan yr Aelodau.

Ar ôl ystyried y cynigion, roedd yr Aelodau'n cefnogi'r argymhellion a gynhwyswyd yn yr adroddiad.