Agenda item

Cyflwynodd K Jones, y Prif Weithredwr, gynrychiolwyr Swyddfa Archwilio Cymru ac esboniodd fod archwilwyr allanol y cyngor yn bresennol yng nghyfarfodydd y cyngor yn flynyddol i amlinellu'r astudiaethau yr oeddent wedi'u cynnal a'r casgliadau y daethpwyd iddynt  Mae hyn hefyd yn rhoi cyfle i'r aelodau ofyn cwestiynau'n uniongyrchol i'r archwilwyr.

 

Nododd yr aelodau y bydd Mr C Davies, sef archwilydd arweiniol presennol Swyddfa Archwilio Cymru, yn cael ei olynu gan Ms N. Jenkins.

 

Tynnodd Mr C Davies sylw at y ffaith bod y Crynodeb Archwilio yn cyfuno'r Llythyr Archwilio Blynyddol a'r Adroddiad Gwelliant Blynyddol a gynhyrchwyd yn flaenorol fel dogfennau ar wahân er mwyn darparu un crynodeb o ganfyddiadau perfformiad a gwaith ariannol a wnaed gan Swyddfa Archwilio Cymru yn ogystal â gwaith archwilio arfaethedig yn y dyfodol.

 

Clywodd y cyngor fod yr awdurdod wedi cyflawni’i ddyletswyddau cyfreithiol ar gyfer cynllunio gwelliannau ac adroddiadau blynyddol dyletswyddau statudol a osodwyd arno gan Fesur Llywodraeth Leol (Cymru) 2009. Yn ogystal, roedd y cyngor mewn sefyllfa ariannol gref a oedd yn ei alluogi i fod mewn sefyllfa dda i reoli’i gynaliadwyedd ariannol yn y tymor canolig.

 

Tynnwyd sylw at y ffaith bod cyfleoedd i'r cyngor gryfhau trefniadau corfforaethol ar gyfer diogelu ac wrth roi'r egwyddorion datblygu cynaliadwy ar waith, un o ofynion Deddf Llesiant Cenedlaethau'r Dyfodol (Cymru) 2014. Roedd cyfleoedd hefyd i ddefnyddio'r System Rheoli Perfformiad Corfforaethol newydd i wella'r ffordd y defnyddir gwybodaeth i lywio cynllunio busnes.

 

Anerchodd Mrs N Jenkins, Swyddfa Archwilio Cymru y cyngor gan amlinellu'r blaenraglen ac mae'n edrych ymlaen at weithio gydag aelodau a swyddogion Castell-nedd Port Talbot.

 

Codwyd y pwyntiau canlynol gan yr aelodau:

 

Holodd yr aelodau a oedd unrhyw waith wedi'i wneud i edrych ar amddifadedd ar draws y 22 awdurdod yng Nghymru. Esboniwyd bod Swyddfa Archwilio Cymru’n gweithio ar brosiectau lleol gydag awdurdodau ond maent yn tynnu sylw at unrhyw astudiaethau cenedlaethol sy'n cael effaith leol. Gwneir cymariaethau lle bo modd.

 

Cafwyd trafodaeth ar argaeledd gwybodaeth gymharol mewn perthynas â chronfeydd wrth gefn y cyngor ac ardaloedd o amddifadedd. Esboniwyd bod yr wybodaeth ar gael i'r cyhoedd. Yn ogystal, bydd yr aelodau'n ystyried yr adroddiad Cynaliadwyedd Ariannol diweddaraf maes o law sy'n cynnwys rhywfaint o'r wybodaeth y gofynnwyd amdani.

 

Cafwyd trafodaeth bellach ar ddymunoldeb archwilio lefelau amddifadedd ac anweithgarwch economaidd ledled Cymru i nodi arfer da. Cadarnhaodd yr archwilwyr mai amddifadedd oedd un o elfennau allweddol eu gwaith ac y byddent yn hapus i weithio ar draws awdurdodau yn y dyfodol ac yn hapus i drafod ymhellach.

 

 

PENDERFYNWYD:

Nodi'r gwaith a wnaed gan Swyddfa Archwilio Cymru fel y'i cynhwysir yng Nghrynodeb Blynyddol 2020.