Agenda item

Derbyniodd yr Aelodau drosolwg o'r Datganiad o Gyfrifon 2019-2020, ar ôl i'r archwiliad allanol gael ei gwblhau.

Amlygodd swyddogion fod y Datganiad o Gyfrifon drafft wedi'i gyflwyno i'r Pwyllgor Archwilio yn ystod mis Mehefin 2020 ac y bu rhai newidiadau i'r cyfrifon ers y dyddiad hwnnw.

Aeth swyddogion ymlaen i esbonio ei bod hi’n ofynnol yn wreiddiol i awdurdodau lleol gwblhau a chyflwyno cyfres o gyfrifon i'w harchwilio erbyn 15 Mehefin, gyda gofyniad i gael cymeradwyaeth y Pwyllgor Archwilio. Oherwydd effaith COVID-19, diwygiwyd y dyddiadau hyn yn ddiweddarach. Roedd angen diwygio'r dyddiad cymeradwyo terfynol ar gyfer y cyfrifon i 15 Medi 2020; roedd hyn yn dal i fod yn unol â deddfwriaeth.

Esboniwyd bod prisiad newydd gan yr Actiwari Pensiwn wedi dod i rym ar 1 Ebrill 2020 am y 3 blynedd nesaf; roedd hyn wedi ystyried yr hyn y rhagwelwyd y byddai effeithiau pennaf Dyfarniad McCloud, ac o ganlyniad roedd yr archwilwyr yn fodlon.

O ran y Prisiadau Asedau Eiddo, a grybwyllwyd gan Swyddfa Archwilio Cymru dan yr eitem agenda flaenorol, roedd y rhain yn seiliedig ar brisiadau annibynnol ar gyfer Cynllun Pensiwn Llywodraeth Leol Dinas a Sir Abertawe. Cynhaliwyd y prisiadau hyn yn flynyddol, ac os oedd angen, byddai addasiadau’n cael eu rhoi ar waith trwy'r cyfrifon pensiwn, a fyddai wedyn yn cael eu hadlewyrchu yn Natganiad o Gyfrifon y cyngor. Roedd yr archwilwyr wedi amlygu y gallent gael effaith ar ddichonoldeb a chynaliadwyedd cyffredinol y Cynllun Pensiwn, o ganlyniad i ostyngiadau mewn prisiadau. Dywedodd y Cyfarwyddwr Cyllid a Gwasanaethau Corfforaethol nad oedd unrhyw bryder ar hyn o bryd, ac y byddai angen mynd i'r afael â hyn fel rhan o archwiliad o gyfrifon y Gronfa Bensiwn y flwyddyn nesaf.

Holodd yr aelodau a oedd cyn Gyfarwyddwr yr Amgylchedd ac Adfywio yn gyfarwyddwr cyflogedig Cwmni Rheoli Gwastraff Castell-nedd Port Talbot. Cadarnhaodd swyddogion fod y cyn-gyfarwyddwr yn gyfarwyddwr cyflogedig Cwmni Rheoli Gwastraff Castell-nedd Port Talbot a Neath Port Talbot Recycling Limited ond nad oedd y cyfarwyddwr presennol yn gyfarwyddwr cyflogedig o'r naill na'r llall. Amlygwyd mai'r darparwr gwasanaeth hyd at 30 Medi 2019 oedd Neath Port Talbot Recycling Limited, ond ers 1 Hydref 2019 roedd yr holl staff a swyddogaethau wedi'u trosglwyddo ac yn cael eu gweithredu'n uniongyrchol gan y cyngor. Hysbyswyd yr Aelodau hefyd y byddai Neath Port Talbot Recycling Limited yn diddymu ei hun yn ystod y flwyddyn galendr nesaf ac y byddai angen i'r Aelodau ystyried ffordd ymlaen mewn perthynas â'r Cwmni Rheoli Gwastraff.

Nodwyd nad oedd yr acronymau a restrir dan yr Is-adran Incwm Grantiau yn cael eu cynnwys yn y rhestr termau. Cytunodd swyddogion i ehangu ar y rhain yn fersiwn derfynol y cyfrifon. 

Diolchodd yr aelodau i Swyddfa Archwilio Cymru a swyddogion am y gwaith a wnaed wrth baratoi'r cyfrifon ac am alluogi i'r cyfrifon gael eu cau. 

PENDERFYNWYD:    1. Nodi'r adroddiad.

2. Rhoi cymeradwyaeth i'r Cyfarwyddwr Cyllid a Gwasanaethau Corfforaethol ddiwygio acronymau yn y Datganiadau o'r fersiwn gyhoeddedig derfynol o'r cyfrifon;

3. Cymeradwyo'r Llythyr Sylwadau, sydd wedi'i gynnwys fel Adendwm 1 yr adroddiad a ddosbarthwyd;

4. Cymeradwyo Datganiad o Gyfrifon terfynol 2019-2020, sydd wedi'i gynnwys yn Adendwm 2 yr adroddiad a ddosbarthwyd;

5. Rhoi caniatâd i Gadeirydd y Pwyllgor Archwilio ddarparu ei lofnod electronig ar gyfer y Llythyr Sylwadau a'r Datganiad o Gyfrifon.