Agenda item

Darparwyd trosolwg i'r Aelodau o'r gwasanaethau a ddarperir ar hyn o bryd ar draws y Gwasanaeth Peirianneg a Thrafnidiaeth, sut olwg fydd ar y gwasanaeth a sut bydd yn gweithredu wrth i'r cyngor symud i'r cyfnod adfer.

Ar draws y pum maes gwasanaeth, dywedwyd bod Rheoli Datblygu Priffyrdd (RhDP) a Chludiant Teithwyr a Chludiant o'r Cartref i'r Ysgol wedi'u galluogi'n llawn i barhau fel arfer yn effeithiol cyn belled â'u bod yn gallu delio â gohebiaeth a gweithrediadau beunyddiol, yn dilyn y cyhoeddiad am gau swyddfeydd.

O ran y tîm Rheoli Datblygu Priffyrdd, nodwyd eu bod wedi symud ymlaen gyda rhai ceisiadau cynllunio yr ymdriniwyd â hwy yn ystod cyfnod y cyfyngiadau symud, a bod pobl wedi bod yn araf i fanteisio ar wasanaeth ar-lein y SAB (Corff Cymeradwyo SuDs) a aeth yn fyw yn gynharach eleni, ond bod gwaith bellach yn mynd rhagddo yn y maes hwnnw. Ychwanegwyd bod yr holl asesiadau risg ar waith ar gyfer ymweliadau safle angenrheidiol er mwyn galluogi ceisiadau SAB i symud ymlaen.

Tynnodd swyddogion sylw at y ffaith bod staff, yn enwedig y tîm Adeileddau, wedi bod yn rhan fawr o'r ymateb i'r tair storm fawr ddiweddar, gan gynnwys storm Dennis. Yn dilyn hyn, cynhaliwyd llawer iawn o archwiliadau ar adeileddau a phontydd Castell-nedd Port Talbot. Nodwyd bod difrod saernïol yn effeithio'n fawr un bont ym Mlaengwrach, ond yn dilyn cefnogaeth y Cabinet ar gyfer y bont newydd i'w gosod yno, roedd y bont newydd bellach yn cael ei saernïo, ac roedd gwaith wedi cychwyn er mwyn ei chwblhau erbyn diwedd yr haf.

Esboniwyd i'r Aelodau fod canlyniadau COVID-19 wedi effeithio ar rai meysydd o Ddiogelwch Ffyrdd a Pherfformiad Busnes, yn bennaf oherwydd cau ysgolion. Dywedodd swyddogion fod llawer o'r rhaglenni hyfforddi wedi'u gohirio a bod yn rhaid i staff ailfeddwl sut y gallent symud ymlaen gyda'r rhaglenni; fodd bynnag, roedd rhaglenni bellach yn cael eu datblygu a fyddai'n cael eu darparu ar-lein drwy'r hwb, a byddai sgyrsiau ystafelloedd dosbarth yn cael eu cwblhau drwy dechnoleg byrddau gwyn drwy Microsoft Teams. Diolchodd Dave Griffiths, y Pennaeth Peirianneg a Thrafnidiaeth, i'w cysylltiadau ag Addysg a TG, gan eu bod wedi helpu i gynnal rhaglenni hyfforddi pwysig i bobl ifanc.

Hysbyswyd yr Aelodau am y cynllun beicio i'r gwaith newydd a lansiwyd ar ddechrau mis Gorffennaf, lle'r oedd y nifer a fanteisiodd arno wedi bod yn dda iawn. Soniwyd bod tua 73 o bobl wedi achub ar y cyfle i brynu beiciau drwy'r cynllun (archebwyd 33 o feiciau trydan a thros 40 o feiciau traddodiadol) gydag Aelodau a Swyddogion o fewn y cyngor yn manteisio ar y cynllun hefyd. Ychwanegwyd y byddai rhaglen hyfforddi'n cael ei chyflwyno dros yr haf er mwyn i bobl allu dysgu sut i reidio beic.

O ran perfformiad busnes, nodwyd bod rhai gweithwyr cyflogedig yn yr ardal wedi'u hadleoli i'r gwasanaeth Tracio ac Olrhain i gynnal y llwyth gwaith a bod nifer o drefniadau newydd wedi'u llywio gan TGCh wedi'u cyflwyno; oherwydd canlyniadau cadarnhaol y trefniadau newydd hyn, dywedwyd y byddai'r timau busnes ac ysgrifenyddol yn cael eu hadolygu i nodi a ellid darparu'r gwasanaeth mewn ffordd fwy effeithlon a chynhyrchiol wrth symud ymlaen. Ychwanegwyd y byddai Joy Smith, Rheolwr Diogelwch Ffyrdd a Pherfformiad Busnes, a goruchwylwyr yn adolygu hyn ac y bydd yr Aelodau'n cael clywed am y newidiadau mewn cyfarfod yn y dyfodol.

Esboniodd swyddogion fod y tîm Gwasanaethau Parcio wedi'i atal yn ystod cychwyniad y feirws, gan fod gorfodi ar y stryd ac oddi ar y stryd wedi dod i ben dros dro. Cadarnhawyd y byddai gwasanaethau gorfodi parcio ar y stryd yn ailgychwyn ar ddechrau mis Gorffennaf, a gorfodi parcio oddi ar y stryd yn dechrau ar 1 Awst 2020. Ar 1 Medi byddai taliadau a gorfodi'n cael eu hailgyflwyno ym meysydd parcio canol trefi; soniwyd y byddai hyn yn rhoi cymorth ychwanegol i ganol trefi a manwerthwyr adfer ac i ganol trefi ddechrau agor.

Codwyd mater hawlenni parcio rhithwir newydd, gyda Swyddogion yn egluro bod 1,400 o staff a'r holl Gynghorwyr lleol wedi'u cofrestru ar gyfer hyn hyd yma ac o 1 Medi 2020 ymlaen, ni fyddai angen hawlenni papur. Ychwanegwyd y gellid cyfnewid rhifau cofrestru cerbydau ar-lein pe bai nifer o gerbydau'n cael eu defnyddio ac os oedd unrhyw un yn cael anawsterau gyda hyn gallent gysylltu ag Ian Rees, y Goruchwyliwr Gorfodi Parcio.

Hysbyswyd yr Aelodau fod y tîm cyfan a oedd yn rhan o'r Gwasanaeth Cludiant Cymunedol wedi'i ail-leoli i helpu i sefydlu'r ganolfan dosbarthu bwyd a sefydlwyd i gefnogi'r Cynllun 'Safe and Well', sydd wedi bod yn gweithredu drwy gydol y pandemig. Ychwanegwyd y byddai'r sefyllfa warchod ar gyfer preswylwyr sy'n agored i niwed yn cael ei newid ar 16 Awst 2020, ac o'r dyddiad hwnnw ni fyddai pecynnau bwyd yn cael eu darparu mwyach.

Cadarnhaodd swyddogion, pe bai angen i staff fynd i mewn i'r swyddfeydd ar gyfer unrhyw waith hanfodol, fod rota wedi'i sefydlu er mwyn gwneud hyn yn ddiogel a chynnal mesurau pellter cymdeithasol. Soniwyd bod rhai staff cynorthwyol gweinyddol wedi dechrau mynd i mewn i'r swyddfa i roi cymorth i'r Gyfarwyddiaeth.

Diolchodd y Cynghorydd Simon Knoyle i Dave Griffiths, y Pennaeth Peirianneg a Thrafnidiaeth, a gweddill y tîm am y gwaith a gwblhawyd ar y bont a oedd yn cysylltu Glyn-nedd a Chwmgwrach.

Yn dilyn craffu, cytunwyd i nodi'r adroddiad.

Diolchodd y Pwyllgor i'r gwasanaeth Peirianneg a Thrafnidiaeth am eu holl waith caled yn ystod argyfwng COVID-19 a gofynnodd i Dave Griffiths, Pennaeth Peirianneg a Thrafnidiaeth, gyfleu'r neges i'w dimau.