Agenda a chofnodion drafft

Croesawodd y Cadeirydd bawb i'r cyfarfod.

Ni dderbyniwyd unrhyw ddatganiadau o fuddiannau.

Cymeradwywyd cofnodion y cyfarfod a gynhaliwyd ar 11 Chwefror 2025 fel cofnod cywir.

Rhoddwyd adroddiad cynnydd i'r aelodau am yr adolygiad canol tymor o'r Cynllun Cyflawni Economaidd Rhanbarthol.

Eglurwyd bod SQW yn cynnal adolygiad canol tymor o Gynllun Cyflawni Economaidd Rhanbarthol De-orllewin Cymru, strategaeth allweddol ar gyfer lles economaidd i'r rhanbarth, a luniwyd yn 2021.

Amlygodd swyddogion fod y cynllun yn manylu ar dri uchelgais i'r rhanbarth o ran ffyniant economaidd, a oedd i ddod yn fwy gwydn a chynaliadwy, yn fwy mentrus ac uchelgeisiol, ac yn fwy cytbwys a chynhwysol; er bod yr uchelgeisiau hyn yn eithaf eang, roedd tair cenhadaeth fwy penodol o lawer yn sail iddynt bryd hynny. Nodwyd bod y genhadaeth gyntaf yn canolbwyntio ar hyrwyddo'r ardal o ran ynni adnewyddadwy newydd a datblygu economi Sero Net; roedd yr ail genhadaeth yn ymwneud â chreu sylfaen fusnes gryfach, fwy gwydn a mwy ymgorfforedig a thyfu'r stoc fusnes yn y rhanbarth. Ychwanegodd swyddogion fod y drydedd genhadaeth yn gysylltiedig â thyfu a chynnal y cynnig profiad yn y rhanbarth.

Hysbyswyd y Pwyllgor, yn ogystal ag adolygu'r Cynllun, fod SQW hefyd yn edrych ar sut mae'r economi wedi newid ers i'r ddogfen gael ei llunio; roedd hyn yn cynnwys y newidiadau i'r cyd-destun polisi, gan lywodraethau Cymru a'r DU. Eglurwyd bod SWQ hefyd yn adolygu'r ystod o brosiectau a sefydlwyd dan bob un o'r tair cenhadaeth er mwyn deall y cynnydd a wnaed wrth gyflawni'r prosiectau, yn ogystal â chyfleoedd newydd sydd wedi dwyn ffrwyth, fel y Porthladd Rhydd Celtaidd a'r Gronfa Ffyniant Gyffredin. Soniodd swyddogion fod SQW yn ceisio deall yr holl wybodaeth hon er mwyn darparu ymagwedd strategol newydd i'r rhanbarth; bydd hyn yn cynorthwyo mewn trafodaethau â llywodraethau Cymru a'r DU a buddsoddwyr mewnol, yn enwedig wrth leisio'r hyn y gellir ei gyflawni yn ystod y blynyddoedd nesaf.

Nodwyd bod SQW wedi darparu cyflwyniad i Fwrdd Cynghori'r Sector Preifat yr wythnos diwethaf; bydd Aelodau'r Bwrdd yn darparu sylwadau ysgrifenedig i'w cynnwys wrth adolygu'r Cynllun. O ran y camau nesaf, eglurodd swyddogion y bydd SQW yn cael eu gwahodd i gyfarfod o'r Is-bwyllgor hwn yn y dyfodol i rannu'r gwaith a gwblhawyd a'r argymhellion ar gyfer symud ymlaen.

Gofynnodd yr aelodau a oedd amserlenni penodol ar gyfer cwblhau'r darn hwn o waith. Nodwyd mai'r nod oedd cwblhau'r gwaith hwn ym mis Medi 2025.

Cynhaliwyd trafodaeth mewn perthynas â chyfleoedd posib ar gyfer dysgu a rennir rhwng Bwrdd Cynghori'r Sector Preifat a'r Is-bwyllgor hwn mewn perthynas â'r darn hwn o waith. Croesawodd swyddogion yr awgrym a byddent yn edrych ar gyfleoedd ar gyfer trafodaethau cydweithredol. 

Gofynnodd yr aelodau a oedd unrhyw gyllid cychwynnol i gyd-fynd â'r strategaeth hon. Dywedwyd bod y strategaeth gyntaf wedi'i hariannu gan Lywodraeth Cymru, ond ers hynny nid oedd swyddogion wedi defnyddio cyllid ar gyfer y gwaith hwn; y farn oedd y dylid llunio strategaeth gydlynol sy'n seiliedig ar dystiolaeth er mwyn ei defnyddio fel sylfaen mewn trafodaethau â chyllidwyr yn y dyfodol.

Derbyniodd y Pwyllgor gyflwyniad ar ddatblygiad y wefan Mewnfuddsoddi Rhanbarthol.

Nodwyd, ochr yn ochr â'r strategaeth ranbarthol, fod Swyddogion yn datblygu gwefan sy'n adlewyrchu'r cyfleoedd ar draws y rhanbarth; roedd hyn yn ymdrech gydweithredol rhwng cydweithwyr ym mhob un o'r pedwar awdurdod lleol i awgrymu nifer o gyfleoedd y gellir eu cyflwyno i fuddsoddwyr.

Rhannodd swyddogion ddelweddau presennol y wefan; roedd y nodweddion yn cynnwys cefndir y rhanbarth a dangosyddion allweddol, gwybodaeth am dalent a sgiliau, y cysylltedd o ran y rhwydweithiau rheilffyrdd a ffyrdd a map cyfleoedd.

Rhoddwyd gwybod i'r aelodau fod swyddogion yn targedu sawl sector, y mae pob un ohonynt yn cyd-fynd â'r gwaith sy'n cael ei wneud ar y Cynllun Cyflawni Economaidd Rhanbarthol; roedd swyddogion wedi gweithio mewn partneriaeth â'r pedwar awdurdod lleol a SQW i lunio rhestr o flaenoriaethau. Darparwyd enghreifftiau a oedd yn cynnwys gwyddor bywyd a lles, ynni, gweithgynhyrchu clyfar, diwydiannau digidol a chreadigol a hamdden a lletygarwch.

Roedd cyflwyniad y wefan yn cynnwys trosolwg o'r ystod o gyfleoedd buddsoddi a oedd wedi'u cynnwys i arddangos y gwahanol brosiectau a oedd naill ai'n mynd rhagddynt, ar gael neu'n cael eu datblygu; roedd swyddogion wedi lanlwytho cyfanswm o 29 o wahanol gyfleoedd ar draws y rhanbarth. Nodwyd y bydd y sawl sy'n ymweld â'r wefan yn gallu cael manylion pellach am y prosiect, gan gynnwys trosolwg, yr hyn yr oedd yn ceisio'i gyflawni a sut y bydd y prosiect yn gwella'r ardal. Dangosodd swyddogion hefyd sut i ddefnyddio'r map cyfleoedd, a oedd yn ffordd ddaearyddol o weld y gwahanol safleoedd buddsoddi ar draws y rhanbarth.

Eglurwyd bod y wefan wedi'i sefydlu mewn ffordd pe bai datblygwr neu barti â diddordeb am gael rhagor o wybodaeth mewn perthynas ag un o'r prosiectau, y byddai'r cais yn cael ei anfon at yr awdurdod lleol perthnasol a byddai'r rheini â gwybodaeth am y prosiect a dealltwriaeth ohono'n ymdrin â'r cais hwnnw; yna byddai'n ofynnol i'r awdurdod lleol ymdrin â'r diddordeb a grëir gan y wefan.

Hysbyswyd y Pwyllgor fod y wefan yn dal i gael ei datblygu, ac roedd Swyddogion yn gweithio gyda phartneriaid i ddiweddaru'r wefan ymhellach; roedd y gwaith wedi'i reoli gan y grŵp arweinwyr rhanbarthol ar draws y rhanbarth, a oedd yn cynnwys Penaethiaid Gwasanaethau mewn datblygu economaidd. Tynnodd swyddogion sylw at y ffaith bod y wefan wedi’i datblygu i arddangos y gwaith da sy'n cael ei wneud, neu sydd ar fin cael ei wneud, yn y rhanbarth.

Cynhaliwyd trafodaeth ynghylch y gwahanol wefannau a oedd yn weithredol yn y rhanbarth, a'r angen i sicrhau, pa lwybr bynnag a ddefnyddir, y byddai'r defnyddiwr yn cael ei dywys i'r we-dudalen gywir ac yn cael yr wybodaeth y byddai ei hangen arno.

Holodd yr aelodau pam nad oedd rhai prosiectau wedi'u rhestru ar y wefan. Nodwyd bod y wefan yn cael ei datblygu o hyd; os oedd sectorau ar goll neu ardaloedd yr oedd angen eu datblygu, gallai swyddogion eu hychwanegu at y wefan yn ôl yr angen.

O ran amserlenni, amlygwyd y byddai'r wefan  ...  Gweld y cofnodion lawn ar gyfer eitem 5.

Unrhyw eitemau brys yn ôl disgresiwn y Cadeirydd yn unol ag Adran 100BA(6)(b) o Ddeddf Llywodraeth Leol 1972 (fel y’i diwygiwyd)

Ni dderbyniwyd unrhyw eitemau brys.